ایپل کے نئے فلیگ شپ اسمارٹ فون آئی فون 18 پرو میکس سے متعلق نئی لیکس اور رپورٹس نے صارفین کی توجہ حاصل کرلی ہے۔ رپورٹس کے مطابق ایپل رواں سال ستمبر میں آئی فون 18 پرو، آئی فون 18 پرو میکس اور اپنے پہلے فولڈ ایبل آئی فون کو متعارف کرا سکتا ہے
جبکہ متحدہ عرب امارات میں نئے آئی فونز کی فروخت 18 یا 19 ستمبر 2026 کے آس پاس شروع ہونے کا امکان ہے۔ تاہم ایپل نے تاحال ان تفصیلات کی باضابطہ تصدیق نہیں کی۔
یہ بھی پڑھیں: کیا ایپل آئی فون ایئر 2 بڑا سرپرائز دینے جارہا ہے؟ لانچ اور نئے فیچرز سے متعلق اہم تفصیلات
لیک رپورٹس کے مطابق آئی فون 18 پرو میکس میں گزشتہ ماڈل کے مقابلے میں کئی نمایاں تبدیلیاں متوقع ہیں۔
۔ 2 نینو میٹر A20 Pro چِپ
آئی فون 18 پرو میکس میں ایپل کی نئی A20 Pro چِپ دیے جانے کی اطلاعات ہیں جو TSMC کی 2 نینو میٹر ٹیکنالوجی پر تیار کی جائے گی۔ اس سے فون کی کارکردگی اور بجلی کے استعمال میں بہتری متوقع ہے۔
۔ مزید چھوٹا Dynamic Island
رپورٹس کے مطابق ایپل Face ID کے بعض اجزا کو ڈسپلے کے اندر منتقل کرکے Dynamic Island کا سائز کم کرسکتا ہے جس سے صارفین کو نسبتاً زیادہ اسکرین اسپیس ملنے کا امکان ہے۔
۔ ایپل کا اپنا C2 موڈیم
آئی فون 18 پرو میکس میں ایپل کے نئے C2 موڈیم کی شمولیت متوقع ہے۔ اس اقدام سے ایپل کا Qualcomm پر انحصار مزید کم ہوسکتا ہے جبکہ بعض رپورٹس میں سیٹلائٹ کے ذریعے 5G کنیکٹیویٹی کی صلاحیت کا بھی ذکر کیا گیا ہے۔
کیمرے میں بڑا اپ گریڈ
سب سے زیادہ زیرِ بحث اپ گریڈ Variable Aperture کیمرہ ہے۔ تازہ اطلاعات کے مطابق یہ فیچر ممکنہ طور پر صرف آئی فون 18 پرو میکس تک محدود رکھا جاسکتا ہے۔ اس ٹیکنالوجی سے کیمرہ لینز میں داخل ہونے والی روشنی اور تصاویر میں پس منظر کے دھندلے پن کو بہتر انداز میں کنٹرول کیا جاسکے گا۔
۔ نیا ڈیزائن اور Dark Cherry رنگ
لیک رپورٹس میں آئی فون 18 پرو میکس کے لیے Dark Cherry سمیت نئے رنگوں کا ذکر کیا گیا ہے۔ تاہم رنگوں اور بیک پینل کے ڈیزائن سے متعلق اطلاعات میں اب بھی اختلاف پایا جاتا ہے۔
نسبتاً موٹا اور بھاری فون
نئے کیمرہ ہارڈویئر اور ممکنہ طور پر بڑی بیٹری کے باعث آئی فون 18 پرو میکس کے وزن اور موٹائی میں معمولی اضافہ متوقع ہے۔ بعض لیکس میں اس کا وزن تقریباً 240 گرام تک ہونے کا دعویٰ کیا گیا ہے۔
بڑی بیٹری
کچھ رپورٹس کے مطابق آئی فون 18 پرو میکس میں 5,100 سے 5,200 ایم اے ایچ کے درمیان بیٹری دی جاسکتی ہے جو ایپل کے لیے اب تک کی سب سے بڑی بیٹریوں میں سے ایک ہوگی۔ تاہم یہ تفصیلات بھی حتمی نہیں ہیں۔
یہ بھی پڑھیں: فولڈ ہوجانے والا آئی فون سال رواں میں لانچ ہوگا، ایپل کمپنی کہاں تانک جھانک کر رہی ہے؟
تاہم آئی فون 18 پرو میکس کی لانچ تاریخ، قیمت، ڈیزائن اور مذکورہ تمام فیچرز فی الحال غیر مصدقہ لیکس اور رپورٹس پر مبنی ہیں۔ ایپل کی جانب سے باضابطہ اعلان کے بعد ہی حتمی تفصیلات سامنے آئیں گی۔
