وزیراعظم محمد شہباز شریف نے کہا ہے کہ حکومت اپوزیشن سے بامقصد بات چیت کے لیے تیار ہے، حکومت نے ہمیشہ مکالمے کو ترجیح دی ہے، اب یہ اپوزیشن پر منحصر ہے کہ وہ حکومت کو کیا جواب دیتی ہے۔
کابینہ اجلاس سے خطاب کرتے ہوئے وزیراعظم نے کہا کہ حکومت مشکل معاشی حالات میں عام آدمی کو ہر ممکن ریلیف فراہم کرنے کے لیے کوشاں ہے۔ ڈیزل کی قیمت میں 32 روپے فی لیٹر کمی خوش آئند ہے، وزارت پٹرولیم اور اس کی ٹیم کی کاوشیں قابل تحسین ہیں۔
وزیراعظم نے کہا کہ حکومت نے مشکل حالات میں عوام کو ریلیف فراہم کرنے کے لیے 128 ارب روپے مختص کیے، جس کے لیے وفاقی حکومت نے پی ایس ڈی پی میں کٹوتی کی۔ عالمی سطح پر تیل کی بڑھتی قیمتوں کا بوجھ عام آدمی پر منتقل ہونے سے روکنے کی کوشش کی گئی۔
انہوں نے کہا کہ خلیج کی موجودہ صورتحال کے باعث تیل اور توانائی کی سپلائی کو شدید مشکلات کا سامنا ہے، خطے کے کئی ممالک میں ریفائنریز اور گیس پلانٹس بند ہیں۔ پاکستان توانائی درآمد کرنے والا ملک ہے، اس لیے عالمی صورتحال کے اثرات پاکستان پر بھی مرتب ہوتے ہیں۔
PM Shehbaz Sharif addresses Cabinet meeting, Live https://t.co/uSqgh8U9Iz
— Pakistan TV Digital (@PakistanTVcom) August 20, 2026
وزیراعظم نے کہا کہ حکومت کی اولین ترجیح مشکل معاشی صورتحال میں عام آدمی کو ریلیف فراہم کرنا ہے، اس سلسلے میں صوبوں نے بھی ساتھ دیا۔ خطے کی صورتحال بہتر ہونے سے پاکستان کی معیشت مزید مستحکم ہوگی۔
انہوں نے کہا کہ وزیر خزانہ محمد اورنگزیب اور ان کی ٹیم نے ریٹیلرز کے ساتھ کامیاب مذاکرات کیے ہیں، جبکہ جولائی میں آئی ٹی برآمدات میں 18 فیصد اضافہ ہوا۔ حکومت کی کوشش ہے کہ ہر شعبے کو ڈیجیٹل کیا جائے۔
مزید پڑھیں:وزیراعظم محمد شہباز شریف نے بجلی کی قیمتوں میں 7 روپے 41 پیسے فی یونٹ کمی کا اعلان کردیا
وزیراعظم شہباز شریف نے ایک بار پھر کہا کہ حکومت اپوزیشن سے بامقصد بات چیت کے لیے تیار ہے اور ہم نے ہمیشہ مکالمے کو ترجیح دی ہے، تاہم اب یہ اپوزیشن پر منحصر ہے کہ وہ حکومت کو کیا جواب دیتی ہے۔
