’فلسطین سے ایران تک ہمارے بم معصوم خواتین اور بچوں کو مار رہے ہیں‘، امریکی رکن کانگریس

امریکی رکن کانگریس دلیہ رامیرز نے فلسطین اور ایران میں امریکی فوجی کارروائیوں پر شدید تنقید کرتے ہوئے کہا ہے کہ امریکی بم معصوم خواتین اور بچوں کی جانیں لے رہے ہیں، جبکہ کانگریس کو صدر ڈونلڈ ٹرمپ اور وزیر دفاع پیٹ ہیگستھ کے جنگی اقدامات پر آنکھیں بند نہیں رکھنی چاہییں۔

دلیہ رامیرز نے سوشل میڈیا پلیٹ فارم ایکس پر جاری بیان میں کہا کہ ایک ایسا دن جو ایک جوڑے کی نئی زندگی کے آغاز کی خوشیوں سے بھرا ہونا چاہیے تھا، تباہی میں بدل گیا۔ فلسطین سے ایران تک، ہمارے بم معصوم خواتین اور بچوں کو ہلاک کر رہے ہیں۔

A day that should be filled with celebrations for a couple’s new beginning turned into devastation. From Palestine to Iran, our bombs are killing innocent women and children.

Congress can't continue to turn a blind eye on Trump and Hegseth's war crimes. The time to hold… https://t.co/ZfHtPDnBwJ

— Congresswoman Delia C. Ramirez (@repdeliaramirez) September 3, 2026

انہوں نے مزید کہا کہ کانگریس ٹرمپ اور ہیگستھ کی جانب سے کیے جانے والے مبینہ جنگی جرائم سے مسلسل آنکھیں نہیں چرا سکتی۔ ان کے بقول جنگ کے ذمہ داروں کو جواب دہ ٹھہرانے کا وقت اب ہے۔

رامیرز نے کانگریس سے مطالبہ کیا کہ ’بلاک دی بمبز ایکٹ‘ منظور کیا جائے، اپنے اختیارات دوبارہ حاصل کیے جائیں اور اس نہ ختم ہونے والی جنگ کا خاتمہ کیا جائے۔

ان کا یہ بیان ایسے وقت میں سامنے آیا ہے جب امریکا اور ایران کے درمیان جنگ جاری ہے اور امریکی فوجی کارروائیوں پر کانگریس کے بعض ارکان کی جانب سے شدید مخالفت سامنے آ رہی ہے۔

یہ بھی پڑھیں:امریکا پر برا وقت، قیادت ’نااہل ترین لوگوں‘ کے ہاتھ میں، جارج کلونی کی ٹرمپ پر کڑی تنقید

یاد رہے کہ امریکی کانگریس کے ترقی پسند ارکان کے ایک حالیہ احتجاج میں بھی رامیرز نے کہا تھا کہ فلسطین سے ایران تک ہمارے بم خواتین اور بچوں کو ہلاک کر رہے ہیں اور امریکی ٹیکس دہندگان کا پیسہ دنیا بھر کے لوگوں کی تکالیف میں اضافہ کر رہا ہے۔ انہوں نے اس موقع پر ایران کے خلاف جنگ کے لیے مزید ایک ڈالر، ایک بہانہ یا ایک بم دینے کی مخالفت کی تھی۔