پاکستان کرکٹ بورڈ ( پی سی بی ) کے الیکشن کمشنر نے نجم سیٹھی کا تجویز کردہ پی سی سی کا بورڈ آف گورنرز مسترد کرتے ہوئے نیا بورڈ آف گورنرز تشکیل دے دیا ہے۔ اب پاکستان کرکٹ بورڈ کے نئے چیئرمین کا انتخاب 27 جون کو ہوگا۔
پاکستان کرکٹ بورڈ (پی سی بی ) کو بین الصوبائی رابطہ (آئی پی سی) کی وزارت سے 20 جون کو خط اور نوٹیفکیشن موصول ہوا، جس میں کہا گیا ہے مدت پوری ہونے پر پی سی بی کی مینجمنٹ کمیٹی تحلیل ہو جاتی ہے اس لیے کمیٹی کام کرنا فوری بند کر دے ۔
اسی مناسبت سے پاکستان کرکٹ بورڈ( پی سی بی) کے الیکشن کمشنر احمد شہزاد فاروق رانا، جو پی سی بی کے قائم مقام چیئرمین بھی ہیں نے پی سی بی کے آئین 2014 کے پیرا 10 کے مطابق پی سی بی بورڈ آف گورنرز تشکیل دیا ہے۔
نئے تشکیل دیے گئے بورڈ آف گورنرز میں محمد ذکا اشرف (پی سی بی کے سرپرست نامزد) مصطفیٰ رمدے (پی سی بی کے سرپرست نامزد)،
نیشنل بینک آف پاکستان، اسٹیٹ بینک آف پاکستان، سوئی ناردرن گیس پائپ لائن لمیٹڈ ، سوئی سدرن گیس کمپنی ، صدر لاڑکانہ ریجن، صدر ڈیرہ مراد جمالی ریجن، صدر بہاولپور ریجن، صدر حیدرآباد ریجن شامل ہیں۔
نئے جاری نوٹیفیکیشن کے مطابق چیئرمین پی سی بی کا انتخاب 27 جون بروز منگل کو پی سی بی ہیڈ کوارٹر لاہور میں ہوگا۔ انتخابی شیڈول محکموں، سروسز آرگنائزیشنز سے نامزدگیوں کی وصولی کے بعد جاری کیا جائے گا۔ الیکشن کمیشن کے دفتر نے اپنے نمائندوں کو نامزد کرنے کے لیے محکموں کو خط لکھ دیا ہے۔
شہزاد رانا نے کہا ہے کہ پاکستان کرکٹ بورڈ( پی سی بی ) کے چیئرمین کا انتخاب منصفانہ اور شفاف طریقے سے منعقد کیا جائے گا جب کہ مناسب طریقہ کار کو اپناتے ہوئے، تمام قانونی ضابطوں کو پورا کیا جائے گا۔ واضح رہے کہ ذکا اشرف اور مصطفی رمدے پہلے ہی گورننگ بورڈ کےلئے نامزد ہیں، دونوں کا نام وزیراعظم شہباز شریف نے تجویز کیا۔
