وزیراعلیٰ پنجاب مریم نواز نے ملتان کے ارکان اسمبلی اور ٹکٹ ہولڈرز سے ملاقات میں عوامی مسائل کے حل کے لیے پیش کی گئی تجاویز اور سفارشات کا جائزہ لیتے ہوئے متعلقہ حکام کو ضروری اقدامات کی ہدایت کردی۔
ملاقات کے دوران ملتان کے ارکان اسمبلی اور ٹکٹ ہولڈرز نے اپنے حلقوں میں عوام کو درپیش مسائل سے وزیراعلیٰ کو آگاہ کیا اور ان کے حل کے لیے مختلف تجاویز پیش کیں۔ مریم نواز نے ارکان اسمبلی کی تجاویز نوٹ کیں اور مسائل کے حل کے لیے ضروری اقدامات کا حکم دیا۔
ارکان اسمبلی اور ٹکٹ ہولڈرز نے ملتان میں جاری ترقیاتی منصوبوں پر وزیراعلیٰ مریم نواز کا شکریہ ادا کیا اور جلالپور پیر والا اور نوراجہ بھٹہ فلڈ بند کی ریکارڈ مدت میں تعمیر پر انہیں خراج تحسین پیش کیا۔
یہ بھی پڑھیں:لاہور میں پاکستان انٹرنیشنل آٹو شو 2026 کا آغاز، مریم نواز نے افتتاح کردیا
ملاقات میں شجاع آباد اور خان گڑھ کے درمیان دریائے چناب پر پل کی تعمیر کی تجویز بھی پیش کی گئی، جس سے وزیراعلیٰ مریم نواز نے اتفاق کیا۔
وزیراعلیٰ نے ملتان میں جیل کو دوسری جگہ منتقل کرکے اس کی جگہ عوامی پارک بنانے کی تجویز کا جائزہ لینے کی بھی ہدایت کی۔
اس موقع پر ارکان اسمبلی نے کہا کہ ترقی کے میدان میں باقی صوبے پیچھے رہ گئے ہیں جبکہ وزیراعلیٰ مریم نواز نے پنجاب میں واضح لیڈ حاصل کرلی ہے۔
مریم نواز نے کہا کہ پنجاب کی ترقی کا فوکس کوئی ایک شہر نہیں بلکہ صوبے کے تمام 40 اضلاع ہیں، حکومت تمام علاقوں میں یکساں ترقی اور عوامی سہولیات کی فراہمی کے لیے اقدامات کررہی ہے۔
