واٹس ایپ اینڈرائیڈ صارفین کے لیے ایک نئے فیچر پر کام کررہا ہے، جس کے ذریعے صارفین اپنی آواز میں پیغام بول کر اسے آڈیو کے بجائے تحریری پیغام کی صورت میں بھیج سکیں گے۔
ٹیکنالوجی سے متعلق رپورٹ کے مطابق یہ فیچر واٹس ایپ کے اینڈرائیڈ بیٹا ورژن 2.26.37.8 میں دیکھا گیا ہے، تاہم فی الحال اس پر کام جاری ہے اور بیٹا صارفین کے لیے بھی دستیاب نہیں کیا گیا۔
یہ بھی پڑھیں: واٹس ایپ کی پرائیویسی خطرے میں؟ یہ 5 سیٹنگز فوراً چیک کریں
رپورٹ کے مطابق نئے فیچر کے تحت چیٹ بار میں ایک مخصوص بٹن شامل کیا جائے گا۔ بٹن دبانے کے بعد صارف اپنا پیغام بول سکے گا جبکہ واٹس ایپ اس دوران ‘سن رہا ہے’ کا اشارہ دکھائے گا۔
آواز کو تحریر میں تبدیل کرنے کے بعد صارف پیغام کا جائزہ لے سکے گا اور پسند آنے پر اسے بھیجنے کے لیے سینڈ بٹن دبا سکے گا۔
توقع ہے کہ یہ فیچر انفرادی چیٹس، گروپس اور چینلز میں کام کرے گا۔ عام وائس میسج کے برعکس وصول کنندہ کو آڈیو ریکارڈنگ موصول نہیں ہوگی بلکہ صرف اس کی تحریری شکل پہنچے گی۔
رپورٹ کے مطابق واٹس ایپ اس فیچر کے لیے ڈیوائس میں پہلے سے ڈاؤن لوڈ کیے گئے زبان کے پیکجز استعمال کرنے کا امکان ہے، جس کی مدد سے آواز کو براہ راست ڈیوائس پر تحریر میں تبدیل کیا جاسکے گا۔
یہ بھی پڑھیں: واٹس ایپ میں پرانے پیغامات تلاش کرنا مزید آسان ہوگیا
اس صورت میں مطلوبہ زبان کا پیکج ڈاؤن لوڈ کرنے کے بعد صارف انٹرنیٹ کنکشن کے بغیر بھی آواز کے ذریعے پیغام تحریر کرسکے گا۔
یہ فیچر واٹس ایپ کے پہلے سے موجود وائس میسج ٹرانسکرپشن نظام پر مبنی ہے، جس میں زبان کے پیکجز کے ذریعے آواز کو ڈیوائس پر ہی تحریر میں تبدیل کرنے کی سہولت موجود ہے۔
تاہم واٹس ایپ نے ابھی تک اس فیچر کی عوامی سطح پر دستیابی کی تاریخ کا اعلان نہیں کیا۔ ترقی کے مرحلے میں چیٹ بار میں اس کی جگہ بھی تبدیل کیے جانے کا امکان ہے۔
یہ بھی پڑھیں: واٹس ایپ میں حساس چیٹس کو محفوظ رکھنے کے لیے نیا سیکیورٹی فیچر متعارف
فی الحال وائس ٹو ٹیکسٹ فیچر صرف اینڈرائیڈ کے لیے آزمائشی مرحلے میں ہے اور یہ واضح نہیں کہ واٹس ایپ اسے مستقبل میں تمام صارفین کے لیے کب جاری کرے گا۔
