سیکیورٹی فورسز کی بلوچستان میں آپریشن ردالفتنہ 3 کے تحت دہشتگردوں کے خلاف کارروائیاں جاری ہیں، ضلع چاغی کے علاقے نوکچہ میں کارروائی کے دوران فتنہ الہندوستان کے 2 دہشت گرد ہلاک کردیے گئے۔
مزید پڑھیں:آپریشن ردالفتنہ 3: سیکیورٹی فورسز کی مستونگ میں کارروائی، 9 دہشتگرد ہلاک
سیکیورٹی ذرائع کے مطابق فتنہ الہندوستان کے دہشتگردوں نے نوکچہ میں ایک خالی واٹر باؤزر کو آگ لگانے کے بعد فرار ہونے کی کوشش کی، تاہم سیکیورٹی فورسز نے فوری اور مؤثر کارروائی کرتے ہوئے دونوں دہشتگردوں کو ہلاک کردیا۔
سکیورٹی ذرائع کا کہنا ہے کہ ہلاک دہشتگرد این 40 شاہراہ کے مختلف مقامات پر آتشزدگی کی کارروائیوں میں بھی ملوث تھے۔ اس سے قبل 31 اگست کو بھی اسی نوعیت کی تخریبی کارروائیوں میں ملوث فتنہ الہندوستان کے 11 دہشتگرد ہلاک کیے گئے تھے۔
سیکیورٹی فورسز کی جانب سے بلوچستان میں دہشتگردوں کے خلاف کارروائیاں جاری ہیں اور سیکیورٹی ذرائع کے مطابق صوبے سے آخری دہشتگرد کے خاتمے تک کارروائیاں جاری رہیں گی۔
سیکیورٹی فورسز کی بلوچستان میں آپریشن ردالفتنہ 3 کے تحت دہشت گردوں کیخلاف بھرپور کارروائیاں جاری
ضلع چاغی کےعلاقے نوکچہ میں سیکیورٹی فورسزکی کامیاب کارروائی، 2 دہشتگرد جہنم واصل، سیکیورٹی ذرائع@SdqJaan @KhUsamaIqbal pic.twitter.com/lsUQJVq5jO— Media Talk (@mediatalk922) September 29, 2026
دوسری جانب وزیراعظم محمد شہباز شریف نے خیبر پختونخوا اور بلوچستان میں دہشتگردوں کے خلاف کامیاب آپریشنز پر سکیورٹی فورسز کو خراج تحسین پیش کیا ہے۔
وزیراعظم نے کہا کہ سکیورٹی فورسز نے اپنی پیشہ ورانہ صلاحیتوں، جرات اور بہادری کا مظاہرہ کرتے ہوئے دہشتگردوں کے مذموم عزائم ناکام بنائے۔ پوری قوم دہشتگردی کے خلاف جنگ میں اپنی بہادر سکیورٹی فورسز کے شانہ بشانہ کھڑی ہے۔
محمد شہباز شریف نے کہا کہ ملک سے دہشتگردی کے مکمل خاتمے تک کارروائیاں جاری رہیں گی اور پاکستان کے امن و استحکام کو نقصان پہنچانے والے عناصر کو ان کے مذموم عزائم میں کامیاب نہیں ہونے دیا جائے گا۔
مزید پڑھیں:آواران میں سیکیورٹی فورسز کا آپریشن، فتنہ الہند کے 3 دہشتگرد ہلاک
وزیراعظم نے کامیاب آپریشنز میں حصہ لینے والے سیکیورٹی فورسز کے افسران اور جوانوں کو سلام پیش کرتے ہوئے کہا کہ پوری قوم کو اپنے بہادر سپوتوں پر فخر ہے۔
