اسلام آباد کے تھانہ نون کی حدود میں پولیس نے بروقت اور مؤثر کارروائی کرتے ہوئے راہزنی کی واردات کے بعد فرار ہونے والے اسنیچر کو ہلاک کردیا۔
ترجمان اسلام آباد پولیس کے مطابق ملزم راہزنی کی واردات کے بعد فرار ہونے کی کوشش کر رہا تھا، جس پر پولیس ٹیم نے بہادری اور جرأت کا مظاہرہ کرتے ہوئے اس کا تعاقب کیا۔
پولیس کے مطابق فرار ہونے والے ملزم نے پولیس ٹیم پر فائرنگ کی، جس کے دوران گولی لگنے سے ملزم ہلاک ہوگیا، جبکہ فائرنگ کے دوران پولیس کانسٹیبل پیٹ پر گولی لگنے سے زخمی ہوگیا۔
ترجمان کے مطابق زخمی کانسٹیبل کو طبی امداد کے لیے اسپتال منتقل کردیا گیا ہے۔
ترجمان نے بتایا کہ ہلاک ملزم کے قبضے سے راہزنی کی واردات میں چھینے گئے 3 موبائل فونز، وارداتوں میں استعمال ہونے والا موٹر سائیکل اور 30 بور پستول بھی برآمد کرلیا گیا۔
