پاکستان پیپلز پارٹی خیبرپختونخوا کے صوبائی صدر سید محمد علی شاہ باچا نے کہا ہے کہ پیپلز پارٹی کی قیادت، بالخصوص بلاول بھٹو زرداری اور آصف علی زرداری، نے حکومت اور اپوزیشن کو مذاکرات کی میز پر لانے کی کوشش کی، جس کے نتیجے میں مذاکرات 99 فیصد تک کامیاب ہو گئے تھے، تاہم باقی ایک فیصد معاملہ وزیراعلیٰ خیبرپختونخوا سہیل آفریدی کے کردار کے باعث حل نہ ہوسکا۔
انہوں نے الزام عائد کیا کہ وزیراعلیٰ سہیل آفریدی صوبے میں امن اور ترقی نہیں چاہتے اور نہ ہی دہشتگردی کے خاتمے کے لیے سنجیدہ ہیں۔ ان کے مطابق وزیراعلیٰ سیاسی شہید بننے اور عوام میں خود کو ہیرو ثابت کرنے کی کوشش کر رہے ہیں، جبکہ انہیں نہ عوام کی فکر ہے اور نہ عمران خان کی۔
سید محمد علی شاہ باچا نے دعویٰ کیا کہ پی ٹی آئی کا لانگ مارچ 12 اکتوبر تو دور کی بات، 24 اکتوبر تک بھی اسلام آباد نہیں پہنچ سکتا۔ ان کا کہنا تھا کہ مارچ کا رخ مسلسل تبدیل ہو رہا ہے اور یہ کوہاٹ، پشاور، خیبر، چارسدہ، ملاکنڈ، سوات اور چترال سے ہوتا ہوا بالآخر افغانستان کی طرف جا کر ختم ہوگا۔
