گورنر خیبر پختونخوا فیصل کریم کنڈی نے واضح کیا ہے کہ سیاسی یا ذاتی اختلافات اپنی جگہ، لیکن صوبے میں پائیدار امن اور ترقی کے لیے تمام اسٹیک ہولڈرز کو ایک پیج پر آنا ہوگا۔ پشاور میں منعقدہ ایک تقریب سے خطاب کرتے ہوئے انہوں نے زور دیا کہ خیبر پختونخوا کا روشن مستقبل اور امن کی بحالی ہماری اولین ترجیح ہے۔
تقریب کے دوران گورنر کا کہنا تھا کہ اس صوبے کے عوام، بشمول معصوم اسکول کے بچوں اور ہر مکتبہ فکر کے لوگوں نے دہشتگردی کے خلاف جنگ میں لازوال قربانیاں دی ہیں اور بڑی تعداد میں شہادتیں پیش کی ہیں۔ انہوں نے کہا کہ اب یہ ہماری مشترکہ ذمہ داری ہے کہ ہم اپنی نوجوان نسل اور بچوں کو ایک محفوظ اور سازگار ماحول فراہم کریں۔
یہ بھی پڑھیے 13 سال کی تباہی دنوں میں ٹھیک نہیں کرسکتا، اسکول انکوائری رپورٹ پر جلد کارروائی ہوگی، فیصل کریم کنڈی
فیصل کریم کنڈی نے مزید کہا کہ دہشتگردی کی لہر نے صوبے کے ہر طبقے کو بری طرح متاثر کیا ہے۔ اب وقت آ گیا ہے کہ ہم مل کر کام کریں تاکہ خیبر پختونخوا کو دوبارہ امن کا گہوارہ بنایا جا سکے اور دنیا کے سامنے صوبے کا ایک مثبت اور بہترین سافٹ امیج پیش کیا جا سکے۔
