وفاقی وزیر خزانہ محمد اورنگزیب نے کہا ہے کہ پاکستان نے ورچوئل اثاثوں کے لیے قانونی اور زیرِ نگرانی مالیاتی نظام کی جانب اہم پیشرفت کی ہے، ملک کو ایسی مالیاتی جدت درکار ہے جو کاروباری لاگت کم کرنے کے ساتھ زیادہ سے زیادہ افراد کو باضابطہ معیشت کا حصہ بنائے۔
مزید پڑھیں:نجی شعبے کو ملکی معیشت کی قیادت کا موقع دینا ہوگا، وفاقی وزیر خزانہ محمد اورنگزیب
پاکستان بینکس ایسوسی ایشن کی تقریب سے ورچوئل خطاب کرتے ہوئے وزیر خزانہ نے کہا کہ پاکستان کا معاشی سفر استحکام سے پائیدار ترقی کی جانب جاری ہے، اس مقصد کے لیے مالیاتی نظم و ضبط، برآمدات میں اضافے اور نجی سرمایہ کاری کا فروغ ناگزیر ہے۔
محمد اورنگزیب کا کہنا تھا کہ ڈیجیٹل اثاثوں کو مالیاتی نظام میں جگہ حقیقی معاشی فوائد اور کاروبار میں آسانی کی بنیاد پر ملنی چاہیے۔ ریگولیٹری نظام میں مختلف اقسام کے ڈیجیٹل اثاثوں اور ان سے متعلق معاشی سرگرمیوں کو الگ الگ مدنظر رکھنا ہوگا۔
وزیر خزانہ نے بتایا کہ ورچوئل اثاثہ جات ایکٹ 2026 کے تحت پاکستان میں قانونی فریم ورک قائم کیا گیا ہے، جبکہ پاکستان ورچوئل اثاثہ جات ریگولیٹری اتھارٹی (پی وی اے آر اے) ورچوئل اثاثہ خدمات فراہم کرنے والوں کی لائسنسنگ اور نگرانی کی ذمہ دار ہے۔
مزید پڑھیں:سرکاری و نجی شعبے کی مضبوط شراکت داری معاشی ترقی کے لیے ضروری ہے، وفاقی وزیر خزانہ محمد اورنگزیب
انہوں نے کہا کہ بینک فار انٹرنیشنل سیٹلمنٹس کا منصوبہ ’اگورا‘ ٹوکنائزڈ بینک ڈپازٹس کے ذریعے سرحد پار ادائیگیوں کے امکانات کا جائزہ لے رہا ہے، جس میں مرکزی بینک کے ذخائر کے استعمال کو بھی زیرِ غور لایا جارہا ہے۔
محمد اورنگزیب کے مطابق بلاک چین نیٹ ورکس پر ادارہ جاتی صارفین کے لیے ڈپازٹ ٹوکنز کا استعمال ڈیجیٹل مالیاتی جدت کی عملی مثال ہے۔ ڈیجیٹل ٹیکنالوجی کے ساتھ رقوم کا تحفظ اور ممکنہ خطرات سے نمٹنے میں بینکوں کا کردار انتہائی اہم ہے۔
