وفاقی وزیر پیٹرولیم علی پرویز ملک نے عوام کو خوشخبری سناتے ہوئے کہا ہے کہ نئے فارمولے کے تحت پیٹرول کی قیمت میں 15 روپے فی لیٹر کمی ہو سکتی ہے، جمعہ کو پیٹرول کی قیمت میں 15 روپے فی لیٹر اضافہ ہونا تھا جو نہیں کیا گیا۔
اسلام آباد میں وفاقی وزیر اطلاعات و نشریات عطا اللہ تارڑ کے ہمراہ پریس کانفرنس کرتے ہوئے علی پرویز ملک نے کہا کہ عالمی منڈی میں توانائی کی قیمتیں مسلسل بڑھ رہی ہیں، جس کے اثرات پاکستان کی معیشت پر بھی مرتب ہو رہے ہیں۔ خطے میں کشیدگی کے باعث نقل و حمل، انشورنس اور لاجسٹکس کے اخراجات میں اضافہ ہوا ہے، جس سے توانائی کی فراہمی مزید مہنگی ہو رہی ہے۔
ریفائنریز پر تقریباً 15 ارب روپے کا بوجھ آئے گا، جس سے ہم پٹرول 15 روپے سستا فراہم کر پائیں گے، علی پرویز ملک https://t.co/7PqvT2yTWk
— WE News (@WENewsPk) November 2, 2026
مزید پڑھیں: پیٹرول ریلیف اسکیم مسترد: پیٹرولیم ڈیلرز نے حکومتی طریقہ کار پر سوالات اٹھا دیے
انہوں نے کہا کہ موجودہ بین الاقوامی حالات میں پاکستان کو بھی معاشی مشکلات کا سامنا ہے، تاہم وزیراعظم کی اولین ترجیحات میں عوام کو زیادہ سے زیادہ ریلیف فراہم کرنا شامل ہے۔ اسی مقصد کے تحت حکومت نے فیول سبسڈی اسکیم متعارف کرائی، جس سے کروڑوں افراد فائدہ اٹھا رہے ہیں۔
پیٹرول کی قیمت میں متوقع اضافہ روکنے کے لیے ریفائنریز سے تعاون لیا گیا
وفاقی وزیر پیٹرولیم کے مطابق حکومت نے مشکل معاشی حالات میں عوام پر اضافی بوجھ ڈالنے کے بجائے آئل ریفائنریز سے تعاون کی درخواست کی، جس کے مثبت نتائج سامنے آئے۔
انہوں نے بتایا کہ جمعہ کو پیٹرول کی قیمت میں فی لیٹر 15 روپے اضافہ ہونا تھا، لیکن ریفائنریز کے تعاون سے اس اضافے کو روک لیا گیا۔ اس اقدام کے تحت ریفائنریز نے حکومت کے ساتھ مل کر تقریباً 15 ارب روپے کا مالی بوجھ برداشت کیا۔
علی پرویز ملک کا کہنا تھا کہ ریفائنریز کے تعاون سے عوام کو پیٹرول کی قیمت میں متوقع 15 روپے فی لیٹر اضافے سے بچانا ممکن ہوا۔ انہوں نے یہ بھی کہا کہ آج پیٹرول کی قیمتوں میں کسی نہ کسی حد تک مزید ریلیف ملے گا۔
وزیر پیٹرولیم نے کہا کہ آئل ریفائنریز نے گزشتہ 3 ماہ کے دوران اتنا منافع حاصل کیا ہے جتنا ماضی میں کئی برسوں کے دوران نہیں کمایا تھا، اس لیے موجودہ مشکل صورتحال میں ان سے عوامی ریلیف کے لیے تعاون طلب کیا گیا۔
انہوں نے مزید کہا کہ حکومت کسی کے ساتھ ناانصافی نہیں کرنا چاہتی اور بین الاقوامی بحران سے شفاف انداز میں نکلنے کے لیے اقدامات کر رہی ہے۔
علی پرویز ملک کے مطابق 1 کروڑ 30 لاکھ سے زائد صارفین پیٹرولیم مصنوعات پر حکومتی ریلیف سے مستفید ہو رہے ہیں۔
فیول ریلیف اسکیم کے تحت 27 ارب روپے فراہم کیے جا چکے ہیں، عطااللہ تارڑ
اس موقع پر وفاقی وزیر اطلاعات و نشریات عطا اللہ تارڑ نے کہا کہ وزیراعظم شہباز شریف شروع دن سے اس بات پر زور دیتے رہے ہیں کہ پیٹرولیم مصنوعات کی قیمتوں میں اضافے کا کم سے کم بوجھ عوام کو برداشت کرنا پڑے۔
انہوں نے کہا کہ خطے کی موجودہ صورتحال نے دنیا بھر کی معیشتوں کو متاثر کیا ہے۔ بالخصوص باب المندب اور آبنائے ہرمز میں پیدا ہونے والے حالات کے باعث مختلف ممالک کو معاشی دباؤ کا سامنا ہے۔
وزیر اطلاعات کے مطابق پاکستان کی معیشت بھی ان حالات سے متاثر ہوئی ہے، تاہم اس کے باوجود ملک کے اہم معاشی اشاریے بہتر رہے ہیں۔
عطا اللہ تارڑ نے کہا کہ جمعہ کو پیٹرول کی قیمت میں فی لیٹر 15 روپے اضافہ متوقع تھا، لیکن وزیراعظم کی ہدایت پر یہ بوجھ ریفائنریز پر منتقل کیا گیا تاکہ عوام کو مزید مہنگائی سے بچایا جا سکے۔
وزیراعظم کا پہلے دن سے ویژن تھا کہ عوام پر کم سے کم بوجھ ڈالا جائے۔ جمعہ کو پٹرول کی قیمت میں 15 روپے اضافہ ہونا تھا، لیکن یہ بوجھ ریفائنریز نے اٹھایا اور قیمت نہیں بڑھائی گئی، عطاء تارڑ https://t.co/WPjUPYUQMi
— WE News (@WENewsPk) November 2, 2026
انہوں نے کہا کہ عوام پر مالی دباؤ کم سے کم رکھنا وزیراعظم کا بنیادی مقصد ہے اور حکومت اسی پالیسی کے تحت فیصلے کر رہی ہے۔
فیول ریلیف اسکیم میں 1 کروڑ 50 لاکھ سے زائد رجسٹریشن
وفاقی وزیر اطلاعات نے بتایا کہ وزیراعظم فیول ریلیف اسکیم کے تحت اب تک ایک کروڑ 50 لاکھ سے زیادہ افراد کی رجسٹریشن ہو چکی ہے، جبکہ مستحق صارفین کو ریلیف کی فراہمی کے لیے مجموعی طور پر 27 ارب روپے دیے جا چکے ہیں۔
ان کا کہنا تھا کہ موجودہ حالات میں اتنے بڑے پیمانے پر فیول ریلیف کا نظام قائم کرنا ایک مشکل کام تھا، تاہم مختلف سرکاری محکموں کی مشترکہ کوششوں سے اسے ممکن بنایا گیا۔
انہوں نے کہا کہ لاکھوں نہیں بلکہ کروڑوں افراد کی رجسٹریشن اور انہیں رعایتی نرخوں پر ایندھن کی فراہمی اس اسکیم کی کامیابی کا ثبوت ہے۔
مزید پڑھیں: پیٹرول ریلیف اسکیم کا دائرہ ملک بھر تک بڑھانے کا فیصلہ، مصدق ملک نے بڑا اعلان کردیا
عطا اللہ تارڑ کے مطابق حکومت نے موٹر سائیکل سواروں، چنگ چی رکشوں اور چھوٹی گاڑیوں کے مالکان کو ریلیف فراہم کرنے کے لیے یہ اسکیم شروع کی ہے، جسے آئندہ بھی جاری رکھا جائے گا۔
وزیر اطلاعات نے کہا کہ متعلقہ اداروں نے باہمی رابطے اور مشترکہ حکمت عملی کے تحت فیول سبسڈی اسکیم پر عمل درآمد یقینی بنایا، جبکہ اسی حکمت عملی کے نتیجے میں پیٹرولیم مصنوعات کی قیمتوں میں مزید اضافے کو بھی روکا گیا۔
