بالی ووڈ کے ‘کنگ خان’ شاہ رخ خان 61 برس کے ہوگئے، ساتھی فنکاروں کی جانب سے سالگرہ پر مبارک باد اور نیک تمناؤں کا اظہار کیا گیا۔
پیر 2 نومبر کو شاہ رخ خان کی سالگرہ کے موقع پر بالی ووڈ کی متعدد معروف شخصیات نے سماجی رابطے کی ویب سائٹ انسٹاگرام پر ان کے لیے خصوصی پیغامات جاری کیے اور ان کی فنی صلاحیتوں اور شخصیت کو سراہا۔
یہ بھی پڑھیں:اے آر رحمان نے آشا بھوسلے کو خراج عقیدت پیش کرنے کے لیے شاہ رخ اور سلمان خان کو اکٹھا کرلیا
شاہ رخ خان کی دیرینہ ساتھی اداکارہ کاجول نے بھی انہیں سالگرہ کی مبارک باد دی۔ دونوں فنکاروں نے ‘بازیگر’، ‘کرن ارجن’، ‘دل والے دلہنیا لے جائیں گے’ اور ‘کچھ کچھ ہوتا ہے’ سمیت کئی کامیاب فلموں میں ایک ساتھ کام کیا ہے۔
کاجول نے اپنی انسٹاگرام کہانی میں شاہ رخ خان کو مخاطب کرتے ہوئے لکھا کہ سالگرہ مبارک ہو، ہمیشہ کی طرح شاندار فنکار رہیں، آج کے دن آپ کے لیے بہت ساری محبت اور ایک بڑا سا پیار بھرا گلے ملنا۔
اداکارہ کرینہ کپور نے بھی شاہ رخ خان کو سالگرہ کی مبارک باد دیتے ہوئے ان کی آنے والی فلم ‘کنگ’ میں اپنی شمولیت کی جھلک دکھائی۔ انہوں نے اپنے پیغام میں شاہ رخ خان کو ‘کنگ’ قرار دیتے ہوئے لکھا کہ وہ ہمیشہ بادشاہ رہیں گے اور ان کے ساتھ رقص کرنے کی منتظر ہیں۔
رپورٹس کے مطابق کرینہ کپور فلم میں خصوصی کردار ادا کریں گی اور ‘ڈیڈی کول’ کے عنوان سے ایک خصوصی گانے میں شاہ رخ خان کے ساتھ نظر آئیں گی۔
View this post on Instagram
ہدایت کار کرن جوہر نے بھی شاہ رخ خان کے لیے نیک تمناؤں کا اظہار کیا اور ان کے حالیہ گانے ‘تو مل جائے’ کو سراہا، جس میں 61 برس کی عمر میں اداکار اپنی فٹنس کا مظاہرہ کرتے دکھائی دیے۔
یہ بھی پڑھیں: شاہ رخ خان کی 60ویں سالگرہ، بالی ووڈ کنگ نے اپنی کامیابی کا سہرا خواتین کے سر باندھ دیا
اداکار انیل کپور نے بھی ماضی کی فلموں کی جھلکیاں شیئر کرتے ہوئے شاہ رخ خان کو سالگرہ کی مبارک باد دی۔ ان کا کہنا تھا کہ شاہ رخ خان کے ساتھ برسوں کی ہنسی، بے شمار یادیں وابستہ ہیں، تاہم ان کی شخصیت کا سحر اور شوخی آج بھی برقرار ہے۔
شاہ رخ خان جلد ہی ہدایت کار سدھارتھ آنند کی ایکشن فلم ‘کنگ’ میں مرکزی کردار ادا کرتے نظر آئیں گے۔ فلم میں ان کی بیٹی سہانا خان، دپیکا پڈوکون، ابھیشیک بچن، انیل کپور اور رانی مکھرجی بھی شامل ہیں۔
