پاکستان اور چین کے خلائی تعاون میں اہم پیشرفت ہوئی ہے اور ایک پاکستانی خلا باز چین کے خلائی اسٹیشن پر جانے والا پہلا غیر ملکی بننے جا رہا ہے۔ چین کے سرکاری خبر رساں ادارے شنہوا کے مطابق پاکستانی خلا باز شینژو-24 کے انسان بردار خلائی مشن میں بطور پے لوڈ اسپیشلسٹ شرکت کرے گا۔
چین کی انسان بردار خلائی ایجنسی کے مطابق پاکستانی خلا باز مدار میں مختصر مدت قیام کرے گا اور اس کے بعد شینژو-23 خلائی جہاز کے ذریعے زمین پر واپس آئے گا۔ یہ چین کے انسان بردار خلائی پروگرام کی تاریخ میں پہلا مشترکہ مشن ہوگا جس میں چینی اور غیر ملکی خلا باز ایک ساتھ شرکت کریں گے۔ اس مشن کے ساتھ چین کا خلائی اسٹیشن پہلی مرتبہ کسی غیر ملکی خلا باز کا استقبال کرے گا۔
History To Be Made 🇵🇰🇨🇳
A Pakistani astronaut will join China's Shenzhou-24 mission as a payload specialist, becoming the first foreign astronaut to visit China's Tiangong space station, the China Manned Space Agency announced on November 7, 2026.
The mission patch features… pic.twitter.com/deCsOkXH1x
— Mohsin Ali (@Mohsin_o2) November 7, 2026
چینی حکام نے پاکستانی خلا باز کا نام اور مشن کی روانگی کی تاریخ کا اعلان نہیں کیا۔ تاہم خبر رساں ادارے رائٹرز نے ستمبر میں پاکستان کے خلائی ادارے کے ایک عہدیدار کے حوالے سے بتایا تھا کہ پاکستانی پائلٹس محمد ذیشان علی اور خرم داؤد بیجنگ کے چائنا آسٹروناٹ ریسرچ اینڈ ٹریننگ سینٹر میں کئی ماہ سے تربیت حاصل کر رہے ہیں۔
چین کی سرکاری خلائی ایجنسی کے مطابق پاکستان اور چین نے فروری 2025 میں پاکستانی خلا بازوں کے انتخاب، تربیت اور چینی خلائی اسٹیشن کے مشنز میں شرکت سے متعلق معاہدے پر دستخط کیے تھے۔ اس کے بعد امیدواروں کا انتخاب تین مراحل میں کیا گیا اور 2 پاکستانی متبادل خلا باز منتخب ہوئے۔ چین میں تربیت مکمل کرنے اور امتحانات میں کامیابی کے بعد ان میں سے ایک مشن پر روانہ ہوگا، جبکہ دوسرا متبادل خلا باز کے طور پر خدمات انجام دے گا۔
یہ بھی پڑھیں:کارگو اسپیس کرافٹ تیانژو-9 چینی خلائی اسٹیشن تک پہنچنے میں کامیاب
چینی میڈیا کے مطابق یہ پیشرفت دونوں ملکوں کے خلائی شعبے میں تعاون کو نئی سطح پر لے جائے گی اور چین کے انسان بردار خلائی پروگرام میں بین الاقوامی شرکت کے آغاز کی علامت ہوگی۔
