روس یوکرین جنگ کے دوران تنازعات والے علاقوں سے اب تک 7 لاکھ یوکرینی بچے روس منتقل ہو چکے ہیں، روسی حکام کے مطابق تنازعات والے علاقوں میں چھوڑے گئے لاوارث بچوں کو ایک پروگرام کے تحت روس منتقل کیا گیا ہے، جس کا مقصد لاوارث بچوں کی حفاظت کرنا ہے جبکہ یوکرینی حکام کی جانب سے روس پر بچوں کے اغوا کا الزام عائد کردیا گیا ہے۔
معروف اخبار’عرب نیوز‘ کی رپورٹ کے مطابق روسی حکام کا کہنا ہے کہ تنازعات والے علاقوں سے 7 لاکھ یتیم بچوں کو بحفاظت روس منتقل کیا گیا ہے، ان بچوں نے جنگ کے دوران گولہ باری سے بچتے ہوئے ہمارے فوجیوں کے پاس پناہ حاصل کی تھی۔
عرب نیوز کے مطابق یوکرینی حکام نے کہا کہ روس نے غیر قانونی طور پر بچوں کو روس منتقل کیا ہے، امریکا نے بھی یہی بیان دیا ہے کہ روسی فوجی زبردستی بچوں کو گھروں سے اٹھا کرلے گئے۔
مزید پڑھیں
روس نے فروری 2022 میں اپنے مغربی ہمسایہ ملک یوکرین پر حملہ کیا تھا۔ اس دوران روس نے یوکرین سے بچوں کو روسی سرزمین میں منتقل کرنے کا پروگرام شروع کر دیا تھا، جس کا مقصد یتیموں اور تنازعات کے علاقے میں لاوارث بچوں کی حفاظت کرنا ہے۔
رپورٹ کے مطابق لوگوں اور بچوں کی زیادہ تر نقل و حرکت جنگ کے پہلے چند مہینوں میں ہوئی، اس کے بعد اگست کے آخر میں مشرق اور جنوب میں مقبوضہ علاقوں کو دوبارہ حاصل کرنے کے لیے یوکرین کی جانب سے بڑی جوابی کارروائی کے دوران نقل و حرکت عمل میں آئی۔
جولائی 2022 میں یوکرینی حکام نے ایک رپورٹ جاری کی جس کے مطابق روس نے 2 لاکھ 60 ہزار بچوں کو غیر قانونی طور پر اٹھایا جبکہ یوکرینی مقبوضہ علاقے کے حکام کا کہنا ہے کہ اس وقت 19 ہزار 492 یوکرینی بچوں کو غیر قانونی طور پر روس منتقل کیا گیا ہے۔
