تھانہ ایکسائز پشاور ریجن نے ایک کامیاب کارروائی کرتے ہوئے انوکھے طریقے سے ہیروئن اسمگلنگ کے الزام میں ہنگو کے رہائشی ملزم خالد کو موقع پر 2 کلو ہیروئن برآمد کرکے گرفتار کرلیا گیا ہے۔
تفصیلات کے مطابق ایکسائز اینڈ ٹیکسیشن آفیسر، نارکوٹکس کنٹرول اور سرکل آفیسر پشاور ریجن کے زیر نگرانی ایس ایچ او تھانہ ایکسائز پشاور ریجن نے خفیہ اطلاع پر کتابوں کی جلد میں ہیروئن بند کر کے اسمگل کرنے کی کوشش ناکام بنادی ہے۔
ایکسائز پولیس کے مطابق موٹروے اسٹاپ پر نشاندہی کیے گئے ہنگو کے رہائشی خالد ولد یار حسین کو 5 عدد کتابوں سے بھرے ایک تھیلے کے ساتھ روکا گیا۔ کتابوں کے تفصیل سے جائزے کے بعد ان کی جلدوں کو ادھیڑ کر چھپائی گئی 2000 گرام ہیروئن برآمد کرلی گئی۔
ایکسائز پولیس کے اعلامیہ کے مطابق ملزم کو موقع پر گرفتار کر کے مزید تفتیش اور قانونی کاروائی کیلئے تھانہ ایکسائز پشاور ریجن میں مقدمہ درج کردیا گیا ہے۔
احسان اللہ سیکریٹری محکمہ ایکسائز ، اکمل خان خٹک ڈائریکٹر جنرل ایکسائز اور آفتاب الدین ڈائریکٹر نارکوٹکس کنٹرول نے متعلقہ عملے کی حالیہ کاروائی کو سراہا اور شاباشی دی ہے۔
