مون سون کی بارشوں کے باعث لاہور کے علامہ اقبال انٹرنیشنل ایئرپورٹ سے اڑان بھرنے والی پروازوں کو لاحق خطرات میں اضافہ کے باعث سول ایوی ایشن اتھارٹی نے ایئرپورٹ کو پرندوں کی بہتات کے وقت بند رکھنے کا حکم نامہ جاری کردیا ہے ۔
سول ایوی ایشن اتھارٹی کے نوٹم کے مطابق لاہور ایئرپورٹ کو دو ماہ کے لیے مخصوص اوقات میں بند رکھا جائے گا۔ ایئرپورٹ حکام کے مطابق لاہور ایئرپورٹ کے رن وے پر صبح کے اوقات میں سب سے زیادہ پرندوں کی بھرمار ہوتی ہے، جس کی وجہ سے پرائمری اور سیکنڈری دوںوں رن وے صبح 5 سے 8 بجے تک بند رکھے جائیں گے۔
سول ایوی ایشن کے مطابق پابندی کا اطلاق 15 جولائی سے 15 ستمبر 2023 تک ہو گا۔ نوٹم کے مطابق ایمرجنسی کی صورت میں پندرہ منٹ کی پیشگی اطلاع پر طیاروں کو لینڈنگ کی اجازت دی جائے گی۔
سول ایوی ایشن اتھارٹی نے پابندی کے متعلق تمام ایئرلائنز کو آگاہ کرتے ہوئے پروازوں کے اوقات کار میں ردوبدل کرنے کی ہدایات کردی ہے۔
