وزیر اعظم شہباز شریف نے کہاکہ پاکستان تحریک انصاف (پی ٹی آئی) کا دور قصہ پارینہ بن چکا ہے، عوام پہچان چکی ہے کہ فراڈ کرکے اقتدار میں آنے والوں نے ملک کو تباہ کر دیا ہے، چار سالوں کے دوران پاکستان کی تاریخ کے بڑے اسکینڈل سامنے آئے جن میں 190 ملین پاؤنڈ کی خرد برد، چینی اسکینڈل، بی آر ٹی اسکینڈل اور گھڑی چوری کا اسکینڈل شامل ہے۔
وزیر اعظم شہباز شریف نے لاہور میں یوتھ، بزنس، اینڈ ایگری کلچر لون اسکیم کی تقریب سے خطاب کرتے ہوئے کہاکہ وعدہ کرتا ہوں اگر اس بار انتخابات میں نواز شریف کو موقع دیا گیا تو ہم دونوں بھائی مل کر پاکستان کی تقدیر بدل دیں گے، آج بھی جو منصوبے پاکستان میں چل رہے ہیں وہ نواز شریف کے ہی لگائے ہوئے ہیں عمران نیازی نے تو ایک اینٹ تک اپنے 4 سالہ دور میں نہیں لگائی۔
وزیر اعظم نے کہاکہ چیئرمین پی ٹی آئی عمران خان نے تو اپنے دور میں صرف الزامات لگائے، چور ڈاکو کی گردان کرتے ہوئے پاکستان کی معیشت کو برباد کردیا، جبکہ نواز شریف نے اس ملک کو سی پیک دیا، لوڈ شیڈنگ ختم کی، 10 لاکھ سے زائد لیپ ٹاپ تقسیم کیے سب سے بڑھ کر ملک کو ایٹمی طاقت بنایا۔
وزیر اعظم نے آئی ایم پروگرام پر بات کرتے ہوئے کہاکہ بار بار یہی کہتا ہوں کہ آئی ایم ایف پروگرام حلوہ یا کھیر نہیں ہے یہ بہت چلینجنگ ہے، اس کے لیے ہمیں مزید سخت فیصلے کرنے ہوں گے۔ گزشتہ رات وزیر خزانہ نے پیٹرولیم مصنوعات کی قیمتوں میں کمی کا اعلان کیا یہ کوئی جادو سے نہیں ہوگیا، بلکہ آئی ایم کے پیسے آنے کی وجہ سے ہی ہوا ہے۔
انکا کہنا تھاکہ آئی ایم پروگرام کی وجہ سے پیٹرولیم مصنوعات کی قیمتوں میں کمی کی گئی حالانکہ عالمی منڈی میں پیٹرولیم مصنوعات کی قیمتوں میں اضافہ ہوا ہے۔
’آئی ایم ایف پروگرام کے باعث ڈالر کے مقابلے میں روپے کی قدر مستحکم ہوئی ہے جسکا ریلیف پیٹرول کی قیمتوں میں کمی کرکے عوام کو دیا جا رہا ہے۔‘
انہوں نے کہاکہ اگست میں ہماری حکومت ختم ہوجائے گی، ملک انتخابات کی طرف جا رہا ہے عوام سے اپیل کرتے ہیں کہ سوچ سمجھ کر فیصلہ کریں، ملک کو تباہ کرنے والوں اور ملک کو ترقی کی راہ پر گامزن کرنے والوں کو پہچان کر فیصلہ کریں۔
’وعدہ کرتا ہوں کہ اگر اس بار انتخابات میں نواز شریف کو موقع دیا گیا تو ہم دونوں بھائی مل کر پاکستان کی تقدیر بدل دیں گے۔‘
وزیر اعظم نے مزید کہاکہ ایک شخص عوام کو بہکاتا تھاکہ جو لیپ ٹاپ دے رہے ہیں وہ رشوت ہے، جب کورونا وائرس آیا تو یہی لیپ ٹاپ ان بچوں کے کام آئے، گھروں میں بیٹھ کر روزگار کماتے رہے، آج بھی فری لانسنگ کے لیے طلبہ کو یہی لیپ ٹاپ کام آرہے ہیں، اور یہ عوام کو گمراہ کرنے والوں کے منہ پر طانچہ کے برابر ہے۔
