الخدمت فاؤنڈیشن پاکستان کے صدر ڈاکٹر حفیظ الرحمٰن نے دریائے ستلج میں طغیانی سے متاثرہ علاقے تلوار چیک پوسٹ گنڈا سنگھ بارڈر کا دورہ کیا اور متاثرین میں تیار کھانے کی تقسیم اور میڈیکل کیمپس سمیت دیگر انتظامات کا جائزہ لیا ۔
سینیئر منیجر میڈیا ریلشنز، الخدمت فاؤنڈیشن پاکستان شعیب ہاشمی کے مطابق ڈاکٹر حفیظ الرحمٰن نے ضلعی انتظامیہ اور ریسکیو 1122 کے ذمہ داران سے بھی ملاقات کی اور انہیں بتایا کہ حالیہ شدید بارشوں اور ممکنہ سیلابی صورتحال کے پیش نظر الخدمت فاؤنڈیشن نے اپنے رضاکاروں کو الرٹ کردیا ہے تا کہ کسی بھی ہنگامی صورتحال میں فعال کردار ادا کیا جا سکے۔
صدر الخدمت نے کہا کہ دریائے سندھ کے مختلف مقامات سمیت دریائے ستلج، دریائے راوی اور دریائے چناب کے نواحی علاقوں میں ریلیف کیمپ قائم کر دیے گئے ہیں جہاں الخدمت فاؤنڈیشن کی ریسکیو ٹیمیں ضروری ساز و سامان کے ساتھ موجود ہیں۔
اکرام الحق سبحانی نے پنجاب میں صورتحال بتاتے ہوئے کہا کہ پری مون سون کے پہلے اسپیل میں 8 اور 9 جولائی کو ہونے والی بارشوں کے نتیجے میں 18 ہزار زیر کاشت رقبہ زیر آب آگیا جس سے مونجی کی فصل کو نقصان پہنچا ہے۔
تلوار چیک پوسٹ کا علاقہ 20 سے 22 دیہات پر مشتمل ہے جہاں 5 سے 6 ہزار نفوسس پر مشتمل آبادی متاثر ہوئی ہے۔ الخدمت فاؤنڈیشن نے حالات کا جائزہ لیتے ہوئے تلوار چیک پوسٹ کے مقام پر ریلیف کیمپ قائم کیا جہاں متاثرین کے لیے تیار کھانے اور پینے کے صاف پانی کی فراہمی سمیت میڈیکل کیمپ اور لائیو اسٹاک کے لیے چارے کی فراہمی کا عمل جاری ہے۔
انہوں نے مزید بتایا کہ روزانہ کی بنیاد پر 400 تا 500 افراد میں کھانا اور معائنے کے بعد مفت ادویات تقسیم کی جا رہی ہیں۔
اس موقع پر الخدمت فاؤنڈیشن وسطی پنجاب کے صدر اکرام الحق سبحانی، سینئر منیجر میڈیا ریلیشنز شعیب ہاشمی اور الخدمت ڈیزاسٹر مینجمنٹ کے پروگرام منیجر آصف جمال کے علاوہ مقامی ذمہ داران بھی موجود تھے۔
