وفاقی وزیر داخلہ رانا ثنااللہ نے کہا ہے کہ نگران وزیراعظم کے لیے اسحاق ڈار، رضا ربانی سمیت کسی بھی سیاست دان کا نام ہو سکتا ہے،نواز شریف الیکشن سے ڈیڑھ ماہ قبل واپس آ جائیں گے۔
نجی ٹی وی کے پروگرام میں گفتگو کرتے ہوئے انہوں نے کہا کہ اسٹیبلشمنٹ عمران خان کو اس لیے لائی تھی کیوں کہ نواز شریف ان کی بات کو نہیں مانتے تھے۔
مزید پڑھیں
رانا ثنااللہ نے کہا کہ ٹیکنوکریٹ کبھی نیوٹرل نہیں ہوتے اس لیے میری تجویز ہے کہ نگران وزیراعظم سیاستدان ہو، پنجاب میں پہلے انتخابات ہو جاتے تو عام الیکشن بے معنی ہو جاتے۔
وزیر داخلہ نے کہا کہ نواز شریف وطن واپسی پر پروگرام عوام کے سامنے رکھیں گے، عمران خان وہ شخص ہے جو اپنے مخالفین کو ختم کرنا چاہتا تھا۔
انہوں نے کہا کہ کسی سازش کے تحت الیکشن ملتوی نہیں ہوں گے، یہ نہیں ہو سکتا کہ حکومت 3 ماہ کی چھٹی پر چلی جائے۔
رانا ثنااللہ نے کہا کہ چیئرمین پی ٹی آئی کو گرفتار کرنے سے بہتر ہے ان کا ٹرائل ہو اور پھر اس کے بعد ان کو سزا ہو، اس شخص نے ملک کی سیاست کو تباہ کر دیا۔
وزیر داخلہ نے کہا کہ سانحہ 9 مئی کی پاداش میں عمران خان کا کیس فوجی عدالت میں چلنا چاہیے، کسی ملزم کو اس لیے نہیں چھوڑا جا سکتا کہ اس نے الیکشن لڑنا ہے۔