مرکز میں نگراں وزیراعظم اور سندھ میں نگراں وزیراعلیٰ کے ناموں پر اتفاق رائے کے بعد بلوچستان میں بھی نگراں وزیراعلیٰ کے نام پر اتفاق ہو گیا ہے اور علی مردان ڈومکی کو نامزد کر دیا گیا ہے۔
علی مردان ڈومکی کا تعلق بلوچستان کے علاقے لہڑی سے ہے، علی مردان ڈومکی سبی کے ضلعی ناظم رہ چکے ہیں اور سابق وفاقی وزیر دوستین ڈومکی کے بھائی ہیں۔
مزید پڑھیں
ذرائع کے مطابق وزیراعلیٰ عبدالقدوس بزنجو اور اپوزیشن لیڈر ملک سکندر نے مشاورت سے علی مردان ڈومکی کے نام پر اتفاق کیا ہے۔ تاہم ابھی تک باضابطہ اعلان نہیں کیا گیا۔
واضح رہے کہ اس سے قبل وزیراعلیٰ اور اپوزیشن لیڈر کے درمیان ہونے والی ملاقاتوں میں نگراں وزیراعلیٰ کے نام پر ڈیڈ لاک پیدا ہو گیا تھا، تمام مشاورت کا سلسلہ جاری رکھنے پر اتفاق کیا گیا تھا۔
نگراں وزیراعلیٰ کے لیے حمل کلمتی، شبیر مینگل، کہدہ بابر، میر نصیر بزنجو سمیت دیگر ناموں پر غور کیا جا رہا تھا۔
وزیراعلیٰ اور اپوزیشن لیڈر کے درمیان اتفاق نہ ہونے کی صورت میں معاملہ پارلیمانی کمیٹی کے پاس جانا تھا اگر وہاں پر بھی اتفاق نہ ہوتا تو چیف الیکشن کمشنر تجویز کردہ ناموں میں کسی ایک نام کا اعلان کرتے۔
