گزشتہ روز دو غیرملکی کوہ پیماؤں کی ٹیم کنکورڈیا اور شگر کے مقام پر بری طرح پھنس گئی تھی۔ ایک مقامی گائیڈ کے ہمراہ پولینڈ کے کوہ پیما جبکہ 4 برطانوی کوہ پیماؤں کی ٹیم کی جانب سے ایس او ایس کال موصول ہونے کے بعد پاک فوج نے بروقت آپریشن کرتے ہوئے بیشتر غیر ملکی کوہ پیماؤں کو ریسکیو کرلیا ہے۔
آئی ایس پی آر کے مطابق 4 برطانوی کوہ پیماؤں کو برف پوش پہاڑی سلسلہ کنکورڈیا سے جبکہ پولینڈ سے تعلق رکھنے والے ایک کوہ پیما کو ان کے مقامی گائیڈ سمیت تقریباً 15 ہزار فیٹ کی بلندی پر شگر کے مقام سے ریسکیو کیا گیا ہے۔
بحفاظت اسکردو پہنچنے والے غیرملکی کوہ پیماؤں میں جارج ہرسٹ، ڈیوڈ کوپ، اسٹیفن ریان اور مسٹر ڈیرن کوربی کا تعلق برطانیہ جب کہ ایڈم کا تعلق پولینڈ سے ہے، جو مقامی گائیڈ محمد اقبال کے ہمراہ تھے۔
اطلاع ملنے پر پاک فوج کی طرف سے فوری کاروائی عمل میں لاتے ہوئے پاکستان آرمی ایوی ایشن کے ہیلی کاپٹر وں کے ذریعے ریسکیو آپریشن کا آغاز کیا اور تمام کوہ پیماؤں کو شدید زخمی حالت میں ریسکیو کرلیا گیا۔ بیشتر کوہ پیماؤں کو سانس لینے میں شدید دشواری کا سامنا تھا۔
ریسکیو آپریشن میں پاک فوج کے جوانوں نے بروقت طبی امداد پہنچاتے ہوئے کوہ پیماؤں کو بچا کر ایک نئی مثال قائم کی ہے، جس پر غیر ملکی کوہ پیما پاک فوج کے مشکور اور انکی کاوشوں کے معترف ہیں۔
