کراچی سے اسلام آباد جانے والی مسافر بس کو صوبہ پنجاب کے شہر پنڈی بھٹیاں کے قریب خوفناک حادثہ پیش آگیا جس کے نتیجے میں 18 افراد جھلس کر جاں بحق جبکہ 15زخمی ہو گئے۔
ڈی پی او ڈاکٹر فہد کے مطابق 18 لاشیں نکال لی گئی ہیں۔ حادثے میں بس اور پک اپ وین کا ڈرائیور بھی جھلس کر جاں بحق ہوئے۔ 15 افراد جھلس کر شدید زخمی ہو گئے ہیں جنہیں فوری طور پر طبی امداد کے لیے پنڈی بھٹیاں اور فیصل آباد کے اسپتالوں کی طرف روانہ کردیا گیا ہے۔ زخمیوں میں سے بیشتر کی حالت نازک بتائی جا رہی ہے۔
ڈی پی او ڈاکٹر فہد کے مطابق جاں بحق افراد کی شناخت ڈی این اے کے ذریعے ہوسکے گی۔
حادثہ کی وجہ بیان کرتے ہوئے ڈی پی او کا کہنا ہے کہ پک اپ میں ڈیزل کے ڈرم رکھے ہوئے تھے جس کی وجہ سے بس میں آگ لگی۔
ریسکیو ذرائع کا کہنا تھا کہ مسافر بس میں35 سے 40 مسافر سوار تھے۔
مزید پڑھیں
زندہ بچ جانے والے مسافروں نے بتایا کہ مسافر بس کراچی سے اسلام آباد جا رہی تھی، اچانک گاڑی سے ٹکر کے بعد بس کو آگ نے اپنی لپیٹ میں لے لیا، مسافروں کو باہر نکلنے کا موقع ہی نہیں مل سکا تھا۔
قبل ازیں ڈی ایس پی احسان ظفر نے حادثے میں ہلاکتوں کی تصدیق کرتے ہوئے کہا تھا کہ فیصل آباد موٹروے پر پنڈی بھٹیاں کے قریب پیش آئے حادثےمیں 20 سے زائد افراد جاں بحق ہوئے ہیں جبکہ حادثے میں مزید ہلاکتوں کا بھی خدشہ ہے۔
پولیس کے مطابق صبح سوا 4 بجے کے قریب پک اپ وین اور مسافر بس کی ٹکر ہوئی، جس کے بعد گاڑیوں میں آگ لگ گئی، دونوں گاڑیاں جل کر مکمل تباہ ہو گئیں، پک اپ وین ڈیزل لے کر جا رہی تھی۔
ایم ایس پنڈی بھٹیاں اسپتال کا کہنا ہے کہ 11افرادکی لاشیں اور 15 زخمیوں کوپنڈی بھٹیاں اسپتال لایاگیا، 4زخمیوں کی حالت تشویشناک ہے الائیڈاسپتال منتقل کیا گیا ہے۔
