نگراں وزیر اعلٰی بلوچستان میر علی مردان خان ڈومکی کا کہنا ہے کہ بطور نگراں وزیر اعلٰی اختیار کم ہیں لیکن پھر بھی ہر ضلع کا دورہ کرکے مسائل سے آگاہی حاصل کروں گا اور ان مسائل کے حل کے لیے نگراں وزیر اعظم انوار الحق کاکڑ سے بات کروں گا۔
نگراں وزیراعلٰی بلوچستان میرعلی مردان خان ڈومکی اپنے سرکاری دورے پر سبی پہنچ گئے، جہاں ان کو پولیس کے چاق و چوبند دستہ نے گارڈ آف آنرپیش کیا۔
نگراں وزیراعلٰی کا سرکٹ ہاؤس پہنچنے پر پرجوش اوروالہانہ استقبال کیا گیا، اور ان کے اعزاز میں سرکٹ ہاؤس میں استقبالیہ تقریب کا انعقاد کیا گیا، جس میں عمائدین اور شہریوں کی بڑی تعداد شریک ہوئی۔
نگراں وزیراعلٰی کی جانب سے شرکاء کو کھل کر اپنے خیالات کے اظہار کی دعوت دی گئی، مقررین نے کہاکہ امید ہے نگراں وزیر اعلٰی اپنے بزرگوں کے نقش قدم پر چلتے ہوئے عوامی خدمت کا عمل جاری رکھیں گے۔ مقررین کی جانب سے نگراں وزیراعلٰی کو بجلی سمیت دیگر مسائل سے آگاہ کیا گیا۔
مزید پڑھیں
نگراں وزیر اعلٰی علی مردان خان ڈومکی نے کہاکہ میرے دورہ کا مقصد اپنے علاقے کے عوام سے براہ راست رابطہ ہے، عوام کو سفر کی مشکلات سے بچانے کے لیے خود حاضر ہوا ہوں۔
’ہر ضلع کا دورہ کرکے عوامی مسائل سے آگاہی حا صل کرونگا۔‘
انہوں نے کہاکہ نگراں وزیراعظم سے ملاقات میں انہیں بلوچستان کے دورے کی دعوت دی ہے، ان کو بلوچستان کے مسائل سے آگاہ کرینگے۔
انہوں نے کہاکہ اولین ترجیح یہی ہے کہ امن کا قیام اور صاف و شفاف اور غیر جانبدارانہ انتخابات کا انعقاد کرایا جائے، الیکشن کمیشن کی گائیڈ لائن کے مطابق فرائض سرانجام دوں گا۔
ان کا کہنا تھاکہ میرا یہ دورہ سیاسی نہیں ہے اور نہ ہی بحثیت نگران وزیراعلیٰ سیاست کرنے کا کوئی ارادہ ہے۔ وزیراعلْی ہاؤس کے دروازے بلوچستان کے عوام کے لیے کھول دیے گئے ہیں۔
وزیراعلٰی نے صوبے کے تمام اسٹنٹ کمشنروں کو ہر پندرہ دن میں اپنی تحصیل میں کھلی کچہری لگانے کی ہدایت کر دی، تمام ڈپٹی کمشنر کھلی کچہریوں کی پیش رفت سے وزیراعلٰی کے دفتر کو آگاہ کرینگے۔
