مالاکنڈ میں پاک فوج اور فرنٹیئر کور نارتھ کی جانب سے تعلیم کے فروغ کے لیے اقدامات کا سلسلہ جاری ہے، اس سلسلے میں اعلٰی حکام کے خصوصی احکامات پر مالاکنڈ میں 2 یتیم بھائیوں کو اکیڈمی میں داخل کردیا گیا تاکہ وہ اپنی تعلیم جاری رکھ سکیں۔
دونوں یتیم بھائی شیر خان اور اکبر علی پاک فوج اور فرنٹیئر کور نارتھ کے توسط سے چلنے والے کفالت یتیم خانہ سوات میں گذشتہ 7 سال سے رہائش پذیر تھے، دونوں بھائیوں کو ہنرمند بنانے کے لیے ان کے چچا نے کفالت یتیم خانہ سے نکال کر اپنی دکان میں ویلڈنگ کے کام پر لگا دیا تھا۔
مزید پڑھیں
پاک فوج اور فرنٹیئر کور نارتھ نے دونوں یتیم بھائیوں کو فوری طور پر اکیڈمی میں داخلہ کروانے کے ساتھ ساتھ اسکول بیگ، کاپیاں، کتابیں اور فیس کے اخراجات بھی فراہم کیے۔
یتیم بچوں نے اکیڈمی میں داخلے پر خوشی کا اظہار کرتے ہوئے پاک فوج اور فرنٹیئر کور نارتھ کا شکریہ ادا کیا اور کہا کہ وہ اب تعلیم حاصل کریں گے تاکہ وہ چائلڈ لیبر سے بچ سکیں۔
مقامی لوگوں نے بھی یتیم بچوں کی فلاح و بہبود کے لیے پاک فوج اور فرنٹیئر کور نارتھ کی کاوشوں کو بے حد سراہا ہے۔
