محکمہ انسداد دہشت گردی نے پشاور میں دہشت گردی کا بڑا منصوبہ ناکام بنادیا جبکہ اس سلسلے میں کی گئی کارروائی کے دوران 2 دہشتگرد مارے گئے۔
ترجمان محکمہ انسداد دہشت گردی کے مطابق پشاور کے علاقے ریگی ماڈل ٹاؤن فیز 4 میں دہشت گردوں کے ایک گروہ کے اڈے پر چھاپہ مارا گیا اور کارروائی کے نتیجے میں 2 دہشت گرد ہلاک ہوگئے جبکہ ان کے 6 ساتھی فرار ہوگئے۔
محکمہ انسداد دہشت گردی کے ترجمان نے بتایا کہ دہشت گرد پولیس پر حملہ، ٹارگٹ کلنگ اور تخریب کاری کا منصوبہ بنانے میں مصروف تھے کہ انہیں جا لیا گیا۔
مزید پڑھیں
ترجمان نے مزید بتایا کہ دہشت گردوں کے قبضے سے ایس ایم جی، ہینڈ گرنیڈ، خنجر، فوجی وردیاں، بیٹری سیل سمیت دیگر چیزیں بھی برآمد ہوئیں۔
واضح رہے کہ خیبرپختونخوا میں دہشت گردوں کی جانب سے پولیس و عوام پر حملوں کا سلسلہ جاری ہے اور گزشتہ ماہ بھی جے یو آئی ورکرز کنونشن پر خود کش دھماکے کے نتیجے میں 50 سے زائد افراد شہید اور 100 کے قریب زخمی ہوگئے تھے۔
