پاکستان ہاکی ٹیم فائیو سائیڈ ایشیا کپ کے فائنل میں پہنچ گئی

پاکستان ہاکی ٹیم عمان کو شکست دے کر فائیو سائیڈ ایشیا کپ کے فائنل میں پہنچ گئی۔ عمان کے شہر صلالہ میں جاری فائیو سائیڈ ایشیا کپ اپنے اختتامی مراحل میں داخل ہوگیا۔

پہلے سیمی ٖفائنل میں پاکستان نے عمان کو 3 کے مقابلہ میں 7 گول سے شکست دے کر ایونٹ کا فائنل کھیلنے کا اعزاز حاصل کرلیا ہے۔ پاکستان نے فائیو سائیڈ ورلڈ کپ کے لیے بھی تاریخ میں پہلی بار کوالیفائی کیا ہے۔

پاکستان کی جانب سے کپتان رانا عبدالوحید اشرف نے 5 شاندار گول اسکور کیے جبکہ ارشد لیاقت نے 2 گول اسکور کیے۔ پاکستان فائیو سائیڈ ہاکی ٹیم کی کوچنگ کے فرائض ہیڈ کوچ عالمی ہاکی کپ گولڈ میڈلسٹ پرائیڈ آف پرفارمنس اولمپیئن وسیم فیروز سرانجام دے رہے ہیں، جبکہ ٹیم مینجر میجر (ر) محمد شاہنواز خان اپنی پیشہ ورانہ ذمہ داریاں سرانجام دے رہے ہیں۔

پاکستان فائیو سائیڈ ہاکی ٹیم میں گول کیپرز عبداللہ اشتیاق، علی رضا، ڈیفینڈر محمد عبداللہ، مڈ فیلڈز احتشام اسلم، محمد مرتضیٰ یعقوب، سٹرائکرز ارشد لیاقت ذکریا حیات، رانا عبدالوحید اشرف، عبدالرحمٰن اور عبدالوہاب شامل ہیں۔

فائیو سائیڈ ایشیا کپ میں 11 ٹیمیں شرکت کررہی ہیں، جس میں پاکستان، انڈیا، افغانستان، انڈونیشیا، ایران، جاپان، بنگلہ دیش، ہانگ کانگ چین، قازقستان، ملائیشیا اور میزبان عمان کی ٹیمں شامل ہیں۔