ایشین ہاکی چیمپیئنز ٹرافی میں پاکستان اپنا تیسرا اور اہم میچ 6 اگست اتوار کو جاپان کے خلاف کھیلے گا۔ پاکستان پوائنٹس ٹیبل پر 5 ویں جب کہ جاپان چوتھے نمبر پر ہے۔
ایشین ہائی چیمپیئنز ٹرافی کے مقابلے بھارت کے شہر چنئی میں جاری ہیں جس میں پاکستان، بھارت، ملائیشیا، جاپان۔ جنوبی کوریا اور چین کی ٹیمیں شرکت کر رہی ہیں۔
اس وقت تک کھیلے گئے میچوں میں ملائیشیا کی ٹیم پوائنٹس ٹیبل پر سب سے آگے ہے جب کہ پاکستان 6 ٹیموں میں 5 ویں نمبر پر ہے۔
6 اگست اتوار کو 3 میچز کھیلے جائیں گے، پاکستان اور جاپان کا مقابلہ ہوگا جب کہ بھارتی ٹیم ملائیشیا اور جنوبی کوریا کی ٹیم چین سے نبرد آزما ہو گی۔
میگا ایونٹ میں اتوار کے روز مزید 3 میچوں کا فیصلہ ہو گا۔ پاکستانی ٹیم اپنا تیسرا اور اہم میچ جاپان کے خلاف کھیل رہی ہے، پہلے میچ میں گرین شرٹس کو ملائیشیا کے ہاتھوں 3-1 سے شکست کا سامنا کرنا پڑا تھا جب کہ جنوبی کوریا کے خلاف میچ 1-1 گول سے برابر رہا۔
ملائیشیا کی ٹیم پہلے 2 میچ جیت کر پوائنٹس ٹیبل پر6 پوائنٹس کے ساتھ سرفہرست ہے ، بھارت دوسرے ، جنوبی کوریا تیسرے ، جاپان چوتھے، پاکستان پانچویں اور چین چھٹے نمبر پر ہے۔
جنوبی کوریا کی ٹیم ٹائٹل کا دفاع کر رہی ہے۔ پاکستان اور بھارت کو 3، 3 بار ایشین چیمپیئنزٹرافی جیتنے کا اعزاز حاصل ہے۔
رائونڈ رابن کے تحت کھیلے جانے والے ٹورنامنٹ میں ہر ٹیم 5 میچ کھیلے گی اور 4 ٹاپ ٹیموں کے درمیان سیمی فائنل مقابلے 11 اگست کو کھیلے جائیں گے جب کہ چیمپیئن کا فیصلہ 12 اگست کو ہو گا۔ پاکستانی ٹیم اپنا چوتھا میچ 7 اگست کو چین جب کہ 5 واں اور آخری میچ 9 اگست کو روایتی حریف بھارت کے خلاف کھیلے گی۔
