نگراں وزیراعظم انوار الحق کاکڑ نے یوم دفاع و شہداء پر مادر وطن کے لیے جانوں کے نذرانہ پیش کرنے والے ہیروز کو خراج عقیدت پیش کرتے ہوئے کہا ہے کہ شہداء ہمارے ماتھے کا جھومر ہیں اور ہم ان کی قربانیوں کے مقروض ہیں۔
نگراں وزیر اعظم انواز الحق کاکڑ نے اسلام آباد کے علاقے شکرپڑیاں میں واقع قومی یاد گار میں یوم دفاع و شہداء کی مناسبت سے منعقدہ تقریب سے خطاب میں کہا کہ مادر وطن کے دفاع کے لیے اپنی جانوں کا نذرانہ پیش کرنے والے شہداء کو خراج عقیدت پیش کرتے ہیں اور یہاں یوم دفاع و شہداء کی تقریب میں شرکت کے لیے موجود ہیں کہ ہم اپنے شہداء کو بھولے نہیں ہیں۔
انوار الحق کاکڑ نے کہا کہ شہداء اللہ کی راہ میں اپنی جانوں کا نذرانہ پیش کرتے ہیں جو ہمارے ماتھے کا جھومر ہیں۔ ہم شہداکی قربانیوں اور ان کے خاندانوں کے مقروض ہیں۔ اس قرض کی ادائیگی میں جو چھوٹا سا نذرانہ ہم پیش کرسکتے ہیں وہ ان کی اور ان کے پیاروں کی تکریم ہے۔
انہوں نے کہا کہ یہی وہ جذبہ ہے جس کا ذکر علامہ اقبال نے بھی اپنے اشعار کے ذریعے کیا۔ شہادت ایک عظیم رتبہ ہے جس کا اللہ تعالیٰ کے ہاں بہت بڑا اجر ہے۔
