چترال میں سیکیورٹی فورسز کی کارروائی، 7 دہشت گرد ہلاک، 6 زخمی

ضلع چترال کے علاقے ارسون میں سیکیورٹی فورسزنے مؤثر کارروائی کرتے ہوئے 7 دہشت گرد وں  کو ہلاک اور 6 کو زخمی کر دیا ہے۔

پاک فوج کے محکمہ تعلقات عامہ (آئی ایس پی آر) کی طرف سے جاری بیان میں کہا گیا ہے کہ ہفتہ کے روز خیبر پختونخوا کے ضلع چترال کے علاقے میں سیکیورٹی فورسز نے دہشت گردوں کے ٹھکانوں کو مؤثر طریقے سے نشانہ بنایا اور شدید فائرنگ کے تبادلے میں سیکیورٹی فورسز نے 7 دہشت گردوں کو ہلاک جبکہ دیگر 6 کو شدید زخمی کردیا۔

 پریس ریلیز میں کہا گیا ہے علاقے میں پائے جانے والے دیگر دہشت گردوں کے خاتمے کے لیے علاقے میں آپریشن جاری ہے۔ علاقے کے مقامی لوگوں نے سیکیورٹی فورسز کے آپریشن کو سراہا ہے اور ملک سے دہشت گردی کی لعنت کے خاتمے کے لیے اپنی مکمل حمایت اور تعاون کا یقین دلایا ہے۔

واضح رہے کہ اس سے قبل دہشتگردوں کے ایک گروپ نے 6 ستمبر یوم دفاع کے موقع پر افغانستان سے لوئیر چترال کے سرحدی علاقوں میں حملہ کیا تھا۔

سیکیورٹی فورسز کی جوابی کارروائی میں بمبورت اور جنجرت میں حملہ پسپا کر دیا گیا تھا۔ اس دوران 12 دہشتگرد ہلاک کر دیے گئے، جبکہ بہادری سے لڑتے ہوئے 4 سیکیورٹی اہلکار بھی شہید ہو گئے تھے۔

چترال میں 6 ستمبر کو ہونے والے حملے کی ذمہ داری کالعدم تحریک طالبان پاکستان نے قبول کی تھی۔