ملک میں گاڑیوں کی فروخت میں اگست کے دوران ماہانہ بنیاد پر 23 فیصد اضافہ ریکارڈ کیا گیا۔
آل پاکستان آٹو مینوفیکچررز ایسوسی ایشن کی طرف سے جاری کردہ اعدادوشمارکے مطابق اگست میں ملک میں 100031 یونٹس گاڑیوں کی فروخت ریکارڈ کی گئی جو جولائی کے مقابلہ میں 23 فیصد زیادہ ہے۔ جولائی میں ملک میں 81553 یونٹس گاڑیوں کی فروخت ریکارڈ کی گئی تھی۔
گزشتہ سال اگست کے مقابلے میں رواں سال اگست میں ملک میں گاڑیوں کی فروخت میں سالانہ بنیادوں پر 15 فیصد کمی ہوئی،گزشتہ سال اگست میں ملک میں 117498 یونٹس گاڑیوں کی فروخت ریکارڈ کی گئی جورواں سال اگست میں کم ہوکر100031 یونٹس ہوگئی۔
جاری مالی سال کے پہلے 2 ماہ میں ملک میں 181584 یونٹس گاڑیوں کی فروخت ریکارڈ کی گئی ہے جوگزشتہ مالی سال کی اسی مدت کے مقابلے میں 20 فیصد کم ہے۔ گزشتہ مالی سال کی اسی مدت میں ملک میں 228373 یونٹس گاڑیوں کی فروخت ریکارڈ کی گئی تھی۔
اعدادوشمارکے مطابق جاری مالی سال کے پہلے 2 ماہ میں کاروں کی فروخت میں سالانہ بنیادوں پر50 فیصد کی کمی ریکارڈ کی گئی تاہم جولائی کے مقابلے میں اگست میں کاروں کی فروخت میں ماہانہ بنیادوں پر60 فیصد کی نمو ریکارڈ کی گئی ہے۔
