آرمی چیف کا ترکیہ کا دورہ، صدر ایردوان اور فوجی حکام سے ملاقات

چیف آف آرمی اسٹاف جنرل سید عاصم منیر نے ترکیہ کا سرکاری دورہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے ترکیہ کے صدر رجب طیب ایردوان، ترک وزیر خارجہ و دفاع کے علاوہ ترک جنرل اسٹاف کے کمانڈر، ترک بری اور فضائی افواج کے کمانڈروں سے بھی ملاقات کی۔

آرمی چیف نے ملاقاتوں کے دوران دفاعی اور تربیتی تعاون کو بڑھانے پر زور دیا۔ اور خطے میں امن و استحکام برقرار رکھنے کے لیے ترک فوج کی کوششوں کو سراہا، سپہ سالار نے ترک مسلح افواج کی آپریشنل تیاریوں کے معیار کی بھی تعریف کی۔

اس موقع پر ترک رہنماؤں نے رواں برس فروری میں ترکیہ میں آنے والے زلزلے کے دوران NDMA ٹیموں کے ساتھ کام کرنے والے پاکستانی آرمی انجینئرز کی کوششوں کا اعتراف کیا۔

چیف آف آرمی اسٹاف نے عظیم رہنما کو خراج عقیدت پیش کرنے کے لیے انقرہ میں مصطفیٰ کمال اتاترک کے مزار پر حاضری دی اور پھولوں کی چادر چڑھائی۔

بعد ازاں آرمی چیف نے ترکیہ کی بری فورسز کے ہیڈ کوارٹرز کا دورہ کیا جہاں آمد پر ان کا پرتپاک استقبال کیا گیا اور گارڈ آف آنر پیش کیا گیا۔

چیف آف آرمی اسٹاف کو وزیر دفاع اور ترکیہ کی بری فوج کے کمانڈر نے دونوں ممالک کے درمیان دفاعی تعلقات کو فروغ دینے کے لیے ان کی خدمات کے اعتراف میں لیجن آف میرٹ سے بھی نوازا۔

پاکستان اور ترکیہ کے درمیان مضبوط اور برادرانہ تعلقات ہیں، آرمی چیف

اس موقع پر چیف آف آرمی اسٹاف جنرل سید عاصم منیر نے کہا ہے کہ پاکستان اور ترکیہ کے درمیان مضبوط اور برادرانہ تعلقات ہیں، پاک فوج ترکیہ کی افواج کو متعدد شعبوں میں مکمل تعاون فراہم کرنے کے لیے ہمیشہ تیار ہے۔

سپہ سالار نے کہاکہ پاکستان ہمیشہ اپنے ترک بھائیوں کے ساتھ ہر طرح کے لمحات میں کھڑا رہا ہے، اب بھی دونوں ممالک کے درمیان برادرانہ تعلقات کو مزید مضبوط بنایا جائے گا۔