آرمی چیف کا ترکیہ کا دورہ، صدر ایردوان اور فوجی حکام سے ملاقات

چیف آف آرمی اسٹاف جنرل سید عاصم منیر نے ترکیہ کا سرکاری دورہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے ترکیہ کے صدر رجب طیب ایردوان، ترک وزیر خارجہ و دفاع کے علاوہ ترک جنرل اسٹاف کے کمانڈر، ترک بری اور فضائی افواج کے کمانڈروں سے بھی ملاقات کی۔

آرمی چیف نے ملاقاتوں کے دوران دفاعی اور تربیتی تعاون کو بڑھانے پر زور دیا۔ اور خطے میں امن و استحکام برقرار رکھنے کے لیے ترک فوج کی کوششوں کو سراہا، سپہ سالار نے ترک مسلح افواج کی آپریشنل تیاریوں کے معیار کی بھی تعریف کی۔

پاکستان اور ترکیہ کے درمیان مضبوط اور برادرانہ تعلقات ہیں، آرمی چیف

اس موقع پر چیف آف آرمی اسٹاف جنرل سید عاصم منیر نے کہا ہے کہ پاکستان اور ترکیہ کے درمیان مضبوط اور برادرانہ تعلقات ہیں، پاک فوج ترکیہ کی افواج کو متعدد شعبوں میں مکمل تعاون فراہم کرنے کے لیے ہمیشہ تیار ہے۔

سپہ سالار نے کہاکہ پاکستان ہمیشہ اپنے ترک بھائیوں کے ساتھ ہر طرح کے لمحات میں کھڑا رہا ہے، اب بھی دونوں ممالک کے درمیان برادرانہ تعلقات کو مزید مضبوط بنایا جائے گا۔