پاکستان کی ترقی و استحکام کے لیے ایک دوسرے کے ساتھ تعاون کو بڑھانا ہوگا، آرمی چیف

چیف آف آرمی اسٹاف جنرل سید عاصم منیر نے کہا ہے کہ ہمیں اپنے ملک کی ترقی، استحکام اور امن کے لیے ایک دوسرے کے ساتھ تعاون کو بڑھانا ہوگا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف نے پشاور میں ایپکس کمیٹی کے اجلاس سے خطاب کرتے ہوئے کہاکہ ملک کے امن اور خوشحالی کے لیے اپنی کوششوں کو ہم آہنگ کرنا ہوگا۔

انہوں نے کہاکہ پاک فوج خیبرپختونخوا کی ترقی اور استحکام کو یقینی بنانے کے لیے اپنا بھرپور کردار ادا کرتی رہے گی تاکہ معاشی ترقی کی رفتار کو بڑھایا جاسکے۔

آئی ایس پی آر کے مطابق ایپکس کمیٹی کے اجلاس کے دوران آرمی چیف کو اسمگلنگ، ذخیرہ اندوزی اور منشیات کی اسمگلنگ کے خلاف اقدامات سمیت مجموعی سیکیورٹی صورتحال کے بارے میں بریفنگ دی گئی۔

ایپکس کمیٹی کے اجلاس میں نگراں وزیر اعلیٰ خیبرپختونخوا اعظم خان بھی شریک ہوئے، اجلاس کے شرکا نے شہدا کو زبردست خراج عقیدت پیش کیا۔

آئی ایس پی آر کے مطابق صوبائی ایپکس کمیٹی کے شرکا نے اس عزم کا اظہار کیا کہ ریاستی ادارے عوام کے جان و مال کے تحفظ کے لیے متحد ہیں۔

پاکستان کی خواتین نے ملکی ترقی میں اہم کردار ادا کیا، آرمی چیف

قبل ازیں خواتین کے سمپوزیم سے خطاب کرتے ہوئے آرمی چیف نے کہا کہ پاکستان کی خواتین نے ملکی ترقی میں اہم کردار ادا کیا جو نہایت اہمیت کا حامل ہے۔

آرمی چیف جنرل سید عاصم منیر نے کہاکہ خیبرپختونخوا کی خواتین نے دہشت گردی کے خلاف طویل جنگ کے باعث بے شمار چیلنجز کا سامنا کیا۔

سمپوزیم سے خطاب کرتے ہوئے آرمی چیف نے کہاکہ خیبر پختونخوا کی خواتین نے ان تمام تر چیلنجز کے باوجود پختہ عزم اور بہادری کا ثبوت دیا۔

انہوں نے کہاکہ خواتین خیبرپختونخوا اور نئے ضم شدہ اضلاع کی ترقی میں زیادہ سے زیادہ حصہ لیں تاکہ اس تبدیلی کاپورا پورا فائدہ اٹھایا جاسکے۔