سرحدوں کے دفاع کا حق محفوظ رکھتے ہیں، ضرورت پڑنے پر کوئی بھی کارروائی کریں گے، نگراں وزیراعظم

نگراں وزیراعظم انوار الحق کاکڑ نے کہا ہے کہ پاکستان کی سرحدوں پر سیکیورٹی کی صورت حال کے پیش نظرعام انتخابات میں تاخیر کا کوئی امکان نظر نہیں آتا۔

نگراں وزیراعظم انوار الحق کاکڑ نے ایک غیر ملکی خبر رساں ادارے کو دیے گئے خصوصی انٹرویو میں کہا کہ فی الحال مجھے ایسا کوئی امکان نظر نہیں آتا کہ انتخابات میں تاخیر کی وجہ سرحدوں پر سیکیورٹی کے مسائل ہیں۔

ملک میں ایک ہی وقت میں انتخابی عمل کو مکمل کریں گے، وزیر اعظم

انہوں نے کہا کہ اگرچہ ہماری مغربی اور مشرقی سرحدوں پر صورت حال تشویش ناک ہے لیکن ہمیں یقین ہے کہ ہم صورت حال پر قابو پا لیں گے اورایک ہی وقت میں انتخابی عمل کو مکمل کریں گے۔

ضرورت پڑنے پر دفاع کے لیے کوئی بھی کارروائی کریں گے

جب ان سے پوچھا گیا کہ کالعدم عسکریت پسند تنظیم تحریک طالبان پاکستان (ٹی ٹی پی) کی جانب سے بڑھتے ہوئے خطرے کے پیش نظر کیا افغانستان میں سرجیکل اسٹرائیک اور ڈرون حملوں کا کوئی آپشن موجود ہے تو انہوں نے کہا کہ پاکستان کو دفاع کا حق حاصل ہے۔ جہاں کہیں بھی ہمیں اپنی زمین اور لوگوں کی حفاظت کے لیے کارروائی کی ضرورت محسوس ہوگی، ہم کارروائی کریں گے۔

ان کا مزید کہنا تھا کہ ‘میں ان آپریشنل فیصلوں کی تفصیلات میں نہیں جاؤں گا جو پاکستان لے سکتا ہے۔ لیکن جب کسی خطرے کی وجہ سے ضرورت پڑے گی، تو ہم اس کے مطابق فیصلے کریں گے۔

وزیراعظم نے کہا کہ افغان طالبان کے ساتھ مذاکرات میں پاکستان کے مفادات اولین ترجیح ہیں۔ انہوں نے اس تاثر کو بھی مسترد کیا کہ افغان طالبان پاکستان کے مطالبات سے اتفاق نہیں کر رہے ہیں۔ انہوں نے مزید کہا کہ اسلام آباد بھی پڑوسی ملک کے حکمرانوں سے کوئی خاص مطالبہ نہیں کر رہا ہے۔

طالبان کو دوحہ معاہدے کی پاسداری کرنی چاہییے

وزیراعظم نے دوحہ معاہدے کا حوالہ دیا جس کے تحت طالبان نے افغان سرزمین دوسرے ممالک کے خلاف استعمال نہ ہونے دینے پر اتفاق کیا تھا اور ان کا ماننا ہے کہ افغان طالبان بھی اس بات پر قائل ہیں کہ خطے میں ہمسایہ ممالک کے ساتھ مضبوط اور دوستانہ تعلقات کے لیے اس معاہدے کی پاسداری ضروری ہے۔

انہوں نے کہا کہ معاہدے کی شرائط کو پورا نہ کرنے کی وجوہات مختلف ہوسکتی ہیں، ہم اس حوالے سے اپنا کردار ادا کر رہے ہیں اور انسانی حقوق کے فورمز پر اس کردار پر مصروف عمل بھی ہیں جس کی ہم دوسرے فریق سے بھی توقع رکھتے ہیں۔

وزیراعظم نے کہا کہ پاکستان اور افغانستان کے ساتھ ساتھ وسطی ایشیائی ریاستوں کے درمیان تجارتی تعلقات میں بھی بہتری آرہی ہے۔

پاکستان عالمی سطح پر کبھی تنہا نہیں ہو گا

نگراں وزیر اعظم نے اس تاثر کو بھی مسترد کیا کہ خلیجی ممالک اور بھارت کے درمیان بڑھتے ہوئے تعلقات کے بعد پاکستان عالمی سطح پر تنہا ہوتا جا رہا ہے۔

ان کا کہنا تھا کہ قومیں مفادات کو دیکھ کر کسی عالمی اتحاد اور مفادات کو ہی دیکھ کر ٹکراؤ کی پوزیشن لیتی ہیں اور عالمی سطح پر بننے والے بلاکوں میں شامل ہوتی ہیں یا ان سے دور چلی جاتی ہیں۔

بھارت تا مشرق وسطیٰ راہداری میں خلیجی ممالک کے اپنے مفادات ہیں

انہوں نے کہا کہ اسی طرح کی صورت حال خلیج تعاون کونسل (جی سی سی) کے بارے میں بھی دیکھی جا رہی ہے۔ ’انہوں نے مزید کہا کہ جی سی سی بڑی مقدار میں ہائیڈرو کاربن برآمد کر رہا ہے‘۔

انہوں نے مشرق وسطیٰ اور جنوبی ایشیا کے لیے نئی بندر گاہوں اور ریلوے راہداری کا حوالہ دیتے ہوئے کہا کہ مجھے ایسا نہیں لگتا کہ یہ منصوبہ پاکستان یا کسی دوسرے ملک کے لیے کوئی مسئلہ پیدا کرے گا۔

انہوں نے سوال کیا کہ کیا خلیجی ممالک 1.5 بلین چینیوں پر مشتمل ایکسپورٹ مارکیٹ پر سمجھوتہ کریں گے اور ایک ایسے بلاک میں شامل ہوجائیں گے جس کا ابھی محض تصور کیا جارہا ہے؟ ۔

پاکستان تنازع کشمیر کے لیے عالمی سطح پر آواز اٹھاتا رہے گا

نگراں وزیراعظم انوار الحق کاکڑ نے مزید کہا کہ اقوام متحدہ کی سلامتی کونسل کے حل نہ ہونے والے ایجنڈا آئٹمز میں جموں کشمیر کاتنازع سب سے پرانا ہے اور پاکستان بھارت کے غیر قانونی طور پرزیرقبضہ مقبوضہ جموں کشمیر کے تنازع کو تمام عالمی اورعلاقائی فورمز پر اٹھاتا رہے گا۔

مقبوضہ کشمیرکی صورتحال کا ذکرکرتے ہوئے نگراں وزیراعظم نے مزید کہا کہ مقبوضہ جموں کشمیرمیں انسانی حقوق کی سنگین خلاف ورزیاں ہورہی ہیں۔

ان کا کہنا تھا کہ بھارت کی قابض افواج نے پورے علاقے کو دنیا کی سب سے بڑی جیل میں تبدیل کر دیا ہے جبکہ کشمیریوں کی آوازکو دبایا جارہاہے ۔

انتخابات سے متعلق بعض افواہوں کو مسترد کرتے ہوئے وزیراعظم نے کہا کہ ملک میں عام انتخابات کے انعقاد کی تاریخ کا اعلان الیکشن کمیشن آف پاکستان کا مینڈیٹ ہے اور الیکشن کمیشن نے اس حوالہ سے بعض اقدامات بھی کیے ہیں، ہمیں امید ہے کہ الیکشن کمیشن اس عمل کو ایمانداری سے مکمل کرے گا ۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں