انسداد دہشتگردی عدالت نے پرویز الہی کا ایک روزہ راہداری ریمانڈ منظور کرلیا

انسداد دہشت گردی عدالت اسلام آباد نے سابق وزیراعلیٰ پنجاب پرویز الہی کا راہداری ریمانڈ منظور کرتے ہوئے انہیں جیل بھیج دیا۔

انسداد دہشتگردی عدالت کے جج ابوالحسنات ذوالقرنین نے پرویز الہی کے خلاف جوڈیشل کمپلیکس میں توڑپھوڑ کے مقدمے کی سماعت کی، پرویر الہی کوعدالت میں پیش کیا گیا۔

دوران سماعت جج ابوالحسنات ذوالقرنین نے ریمارکس دیے کہ پرویزالہی کی کب جان چھوٹے گی؟ جس پر پرویز الہی کے وکیل نے کہا کہ ان کے موکل کو کبھی کسی شہر اور کبھی کسی شہر کا چکر لگوا رہے ہیں۔

جس پر جج ابوالحسنات ذوالقرنین نے ریمارکس دیے کہ آپ لوگ بھی ضمانتی مچلکے جمع نہیں کروا رہے، پرویز الہی کے وکیل نے دریافت کیا کہ کون سے مقدمے میں ضمانتی مچلکے جمع کروانے تھے، جس پر تفتیشی افسر نے بتایا کہ جوڈیشل کمپلیکس توڑپھوڑ کیس میں۔

پرویزالہی نے روسٹرم پر آ کر کہا کہ کل اسلام آباد سے انہیں واپس لاہور لے جایا گیا لیکن ان کی فیملی سے ملاقات نہیں کروائی گئی۔ فیملی سے ملاقات کا مناسب آرڈر دے دیں۔ اس پر اے ٹی سی جج ابوالحسنات ذوالقرنین نے کہا کہ جیل والے بھی آپ کی فیملی ہیں۔

اس دوران محکمہ اینٹی کرپشن پنجاب نے پرویز الہی کے راہداری ریمانڈ کی درخواست عدالت میں جمع کروا دی۔

 عدالت نے دلائل سننے کے بعد سابق پرویز الہی کو عدالتی ریمانڈ پر جیل بھیج دیتے ہوئے محکمہ اینٹی کرپشن پنجاب کی جانب سے ان کے راہداری ریمانڈ کی درخواست منظور کر لی ہے۔

پرویز الٰہی کی اہلیہ، بیٹے اور بہو کی 7 روز کے لیے ضمانت منظور

سابق وزیر اعلٰی پنجاب چوہدری پرویز الٰہی کے اہلخانہ کی ضمانت قبل از گرفتاری پر اسلام آباد ہائیکورٹ میں سماعت ہوئی، چیف جسٹس عامر فاروق نے سماعت ان چیمپبر کی۔

درخواست گزاران کی جانب سے وکیل سردار عبدالرازق پیش ہوئے، عدالت نے پرویز الٰہی کی اہلیہ، بیٹے اور بہو کی 20، 20 ہزار کے مچلکوں کے عوض ضمانت منظور کی۔ عدالت نے پرویز الٰہی کی اہلیہ، بیٹے اور بہو کی 7 روز کے لیے ضمانت منظور کی۔