پاکستان نے عالمی مالیاتی فنڈ (آئی ایم ایف) کے بیل آؤٹ پیکج کے حصول کے لیے یوکرین کو ہتھیاروں کی فروخت سے متعلق غیر ملکی میگزین کی رپورٹ کو یکسر مسترد کرتے ہوئے کہا ہے کہ خبر بے بنیاد اور من گھڑت ہے۔
پیر کو پاکستان کے لیے عالمی مالیاتی فنڈ (آئی ایم ایف) کے بیل آؤٹ پیکج حاصل کرنے کے لیے یوکرین کو پاکستانی ہتھیاروں کی فروخت سے متعلق انٹرسیپٹ میگزین کی تازہ رپورٹ کے بارے میں میڈیا کے سوالات کا جواب دیتے ہوئے وزارت خارجہ کی ترجمان ممتاز زہرہ بلوچ نے اس خبر کو بے بنیاد اور من گھڑت قرار دیتے ہوئے مسترد کردیا۔
انہوں نے کہا کہ پاکستان اور عالمی مالیاتی فنڈ (آئی ایم ایف) کے درمیان مذاکرات مشکل لیکن ضروری معاشی اصلاحات کے نفاذ کے لیے اسٹینڈ بائی معاہدے پر ہوئے لیکن ان مذاکرات کو کوئی اور رنگ دینا بے بنیاد اور مضحکہ خیز ہے۔
ترجمان دفتر خارجہ نے کہا کہ پاکستان یوکرین اور روس کے درمیان تنازع کے حوالے سے اپنی غیر جانبدارانہ پالیسی پر سختی سے عمل پیرا ہے۔ پاکستان کی طرف سے کسی کو کوئی اسلحہ یا گولہ بارود فراہم نہیں کیا گیا۔ پاکستان کی دفاعی برآمدات ہمیشہ سخت ترین شرائط کے ساتھ ہوتی ہیں۔
واضح رہے کہ غیر ملکی میگزین انٹر سیپٹ نے اتوار کو ایک رپورٹ میں پاکستان کی داخلی حکومتی دستاویزات کا حوالہ دیتے ہوئے کہا رپورٹ شائع کی تھی کہ امریکا کے ساتھ ہتھیاروں کے خفیہ معاہدے نے پاکستان کو بین الاقوامی مالیاتی فنڈ سے بیل آؤٹ حاصل کرنے میں مدد کی۔
انٹرسیپٹ نے اپنی رپورٹ میں دعویٰ کیا کہ پاکستان نے پہلے امریکہ کو اسلحہ فروخت کیا جو بعد میں یوکرین کو بھیجا جانا تھا۔
