خصوصی سرمایہ کاری سہولت کونسل (ایس آئی ایف سی) کی ایگزیکٹو کمیٹی کا 2 روزہ پانچواں اجلاس منگل کو شروع ہو گیا۔ اجلاس کا مقصد سرمایہ کاری کے ایکو سسٹم کو بہتر بنانا، میکرو اکنامک چیلنجز پر قابو پانا اور معاشی نمو کو تیز کرنے کے لیے اقدامات کا جائزہ لینا ہے۔
اجلاس کے بعد جاری کی گئی پریس ریلیز کے مطابق اجلاس کی صدارت نگران وفاقی وزیر برائے منصوبہ بندی، ترقی و خصوصی اقدامات محمد سمیع سعید نے کی۔ اجلاس میں ایس آئی ایف سی کے نیشنل کوآرڈینیٹر اور وزیراعظم کے معاون خصوصی ڈاکٹر جہانزیب، متعلقہ وفاقی و صوبائی وزرا اور اعلیٰ سرکاری افسران نے شرکت کی۔
مزید پڑھیں
اجلاس میں متعلقہ وزارتوں نے مختصر، درمیانی اور طویل مدتی پالیسی سطح کے اقدامات سے متعلق مختلف پہلوؤں پر ہونے والی پیشرفت سے آگاہ کیا۔
تفصیلی بحث کے بعد کمیٹی نے ملک میں سرمایہ کاری کی راہ میں حائل رکاوٹوں کو دور کرنے اور اسٹیک ہولڈرز کے درمیان اتفاق رائے پیدا کرنے کے لیے قابل عمل اقدامات وضع کیے۔
فورم میں نئے منصوبوں کو شامل کرنے کے علاوہ 4 اہم شعبوں (زراعت، انفارمیشن ٹیکنالوجی، معدنیات اور توانائی) سے متعلق مسائل کو حل کرنے کے منصوبوں کو بھی حتمی شکل دی گئی۔
واضح رہے کہ مشکلات میں گھری معیشت کو اوپر اٹھانے کے لیے خصوصی سہولت سرمایہ کاری کونسل کا قیام عمل میں لایا گیا ہے اور امید کی جا رہی ہے کہ اس پلیٹ فارم کے ذریعے آنے والے وقت میں بہتری ضرور آئے گی۔
