چیف آف آرمی اسٹاف جنرل سید عاصم منیر نے کوئٹہ کا دورہ کیا ہے اور سانحہ مستونگ کے زخمیوں کی اسپتال میں عیادت کی ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے زخمیوں اور شہدا کے لواحقین کو یقین دلایا کہ دہشت گردوں ، ان کے سرپرستوں اور سہولت کاروں کو بخشا نہیں جائے گا۔
آرمی چیف کو مستونگ اور ژوب میں ہونے والے دہشت گرد حملوں پر بریفنگ
آرمی چیف کو مستونگ اور ژوب میں ہونے والے حالیہ دہشت گرد حملوں کے بارے میں بریفنگ دی گئی۔ بریفنگ میں وفاقی وزیر داخلہ، وزیر اعلیٰ بلوچستان اور اہم صوبائی وزرا کے علاوہ اعلیٰ سول و عسکری حکام نے بھی شرکت کی۔
اس موقع پر آرمی چیف جنرل سیّد عاصم منیر نے کہا ہے کہ 12 ربیع الاول کو ہونے والی دہشت گردی اور اس طرح کے واقعات خوارج کے مذموم عزائم کو ظاہر کرتے ہیں۔ اس دہشت گردی کو بیرونی ریاستی سرپرستوں کی پشت پناہی بھی حاصل ہے۔
جنرل عاصم منیر نے کہاکہ یہ دہشت گرد اور ان کے سہولت کار جن کا مذہب اور نظریے سے کوئی تعلق نہیں، وہ پاکستان اور اس کی عوام کے دشمن ہیں۔
انہوں نے کہاکہ دہشت گردوں کے خلاف ہمارا آپریشن بلا تعطل جاری رہے گا، مسلح افواج، انٹیلی جنس ایجنسیاں اور قانون نافذ کرنے والے ادارے اس وقت تک آرام سے نہیں بیٹھیں گے جب تک ملک سے دہشت گردی کی لعنت کو جڑ سے اکھاڑ پھینکا نہیں جاتا۔
ان کا کہنا تھا کہ پاکستانی عوام نے دہشت گردوں کے نظریے اور ان کے پشت پناہوں کے پروپیگنڈے کو مسترد کر دیا ہے۔
مزید پڑھیں
جنرل عاصم منیر نے کہاکہ پاکستانی عوام امن، معاشی ترقی اور انسانی ترقی کے لیے پوری طرح پرعزم ہیں جس کی وجہ سے پاکستان کے اندر اور باہر شر پسند قوتوں کو بہت زیادہ تکلیف پہنچ رہی ہے۔
آرمی چیف نے بلوچستان پولیس اور قانون نافذ کرنے والے اداروں کے اہلکاروں کی بہادری کو خوب سراہا۔
بریفنگ کے موقع پر شرکا کی جانب سے مستونگ، ہنگو اور ژوب کے شہدا کے ایصال ثواب کے لیے فاتحہ خوانی بھی کی گئی، چیف آف آرمی سٹاف نے شہدا کو زبردست خراج تحسین پیش کیا۔
اس سے قبل کوئٹہ آمد پر وزیراعلیٰ بلوچستان اور کور کمانڈر بلوچستان نے آرمی چیف کا استقبال کیا۔
