سری لنکا کے کرمنل انویسٹی گیشن ڈپارٹمنٹ نے خواتین کی اسمگلنگ کے الزامات پر اومان میں تعینات اپنے سفارتکار کو گرفتار کرلیا۔
سری لنکن اخبار کے مطابق کوشان کو آج صبح مسقط سے کولمبو کے بندرانائیکے انٹرنیشنل ایئرپورٹ پہنچنے پر گرفتار کیا گیا۔
تھرڈ سیکریٹری کوشان پر اومان آنے والی ملازمت کی متمنی سری لنکن خواتین سے جنسی ہراسانی، سری لنکا سے خواتین کی اومان میں اسمگلنگ اور انہیں فروخت کرنے کے ساتھ ساتھ بدعنوانی جیسے سنگین الزامات کا سامنا ہے۔
سری لنکا کی پبلک اکاؤنٹس کمیٹی نے کہا کہ سفارتخانے کے عہدیدار کو شکایات پر اس کی سفارتی ذمہ داریوں سے معطل کر دیا گیا ہے۔
کمیٹی کا کہنا تھا کہ سفارتکار کے خلاف رواں برس فروری سے شکایات موصول ہو رہی تھیں۔
اومانی کوسٹ گارڈ کی رپورٹ کے مطابق رواں سال 21 مختلف ممالک کے 203 افراد کو ملک میں غیرقانونی طور پر داخل ہونے پر گرفتار کیا گیا ہے۔
