پاکستان مسلم لیگ (ن) کی سینیئر نائب صدر اور چیف آرگنائزر مریم نواز شریف نے فلسطینی عوام سے اظہار یکجہتی کرتے ہوئے عالمی براردی پر زور دیا ہے کہ وہ فلسطینیوں کا قتل عام رکوائے۔
مسلم لیگ ن کی رہنما نے اپنے ایک پیغام میں کہا کہ دنیا بھر کے انصاف اور انسانیت پسند عوام بےگناہوں کا خون بہنے سے روکنے کے لیے اپنا کردار ادا کریں، نہتے اور محصور فلسطینیوں پر وحشیانہ بمباری جنگی جرائم ہیں ۔
انہوں نے کہا کہ اسپتالوں، قافلوں، نہتی آبادیوں پر حملے بہادروں اور قانون پر چلنے والی اقوام کا شیوہ نہیں ہے، فلسطینیوں کے قتل عام پر اسلامی دُنیا کے عوام میں شدید غم و غصّہ ہے، اسلامی ممالک کی قیادت عوام کی امنگوں کی ترجمانی کرے ۔
مریم نواز کا مزید کہنا تھا کہ اسلامی دنیا امن کے قیام، تنازع فلسطین کے منصفانہ حل اور محصور فلسطینیوں کی مدد کے لیے آگے بڑھ کر کردار ادا کرے اور محصور فلسطینیوں کو خوراک اور ادویات کی فراہمی کا بندوبست کیا جائے۔
