نجی ٹی وی کی مقبول ڈراما سیریل ’محبت گمشدہ میری‘ حال ہی میں خوشگوار انداز میں اختتام پذیر ہوئی۔ ڈراما سیریل کو دُنیا کے مختلف حصوں سے لاکھوں ناظرین نے دیکھا اور پسند کیا۔
’محبت گمشدہ میری‘ مومنہ درید کی پروڈکشن تھی جب کہ ڈرامے کی کہانی معروف پاکستانی مصنف راحت جبین نے لکھی تھی۔ اس ڈرامے کی ہدایت کاری شاہد شفاعت نے کی۔
’محبت گمشدہ میری’ میں ایک بہت ہی کم عمر جوڑے کی محبت کی کہانی پیش کی گئی ہے جنہوں نے اپنے والدین کی مرضی کے بغیر شادی کر لی۔ ڈراما سیریل میں زوبی اور صائم کے کردار خوشحال خان اور دانیر مبین نے ادا کیے۔ مداحوں نے خوشحال خان اور دانیر مبین کی نوجوان اور تازہ جوڑی کے کردار کو بہت سراہا۔
ڈراما سیریل کے اختتام کو بھی مداحوں کی جانب سے پسند کیا گیا، مداحوں نے دانیر مبین کے خوبصورت دلہن کے روپ کی بھی بہت تعریف کی۔
ڈراما سیریل ’محبت گمشدہ میری‘ میں کردار ادا کرنے والی خوبصورت اداکارہ نے سوشل میڈیا خصوصاً ’انسٹا گرام‘ پر اپنے دلہن کے شاندار روپ کی تصاویر شیئر کی ہیں۔
اس سے پہلے دانیر مبین نے ’محبت گمشدہ میری‘ کے سیٹ کی کچھ تصاویر شیئر کی تھیں ۔
