وزارتِ صحت نے کہا ہے کہ اسلام آباد کے سرکاری اسپتالوں کے سربراہان کی بھرتی ریکروٹمنٹ رولز کے مطابق ہوگی، مروجہ طریقے کار پر سختی سے عمل کیا جائے گا۔ اس سلسلے میں انتظامیہ کو ہدایات جاری کر دی گئی ہیں۔
ترجمان وزارتِ صحت کے مطابق یہ فیصلہ وفاقی وزیر صحت کی سربراہی میں 25 اگست 2023 کو منعقدہ اجلاس میں ہوا تھا۔ جس میں کہا گیا تھا کہ حکومت بھرتیوں میں شفافیت اور میرٹ پر سختی سے عمل کرنے کا عزم رکھتی ہے۔
ترجمان کا کہنا تھا کہ اس سلسلے میں سوشل میڈیا پر غیر مصدقہ اطلاعات اور مفروضوں پر دھیان نہ دیں۔ کوئی غیر مصدقہ اطلاع اور مہم ہمیں صحت کی سہولیات کو بہتر بنانے کے مشن سے نہیں روک سکتیں۔ وزارت صحت عوام کو صحت کی بہتر سہولیات فراہم کرنے کے لیے بہترین امیدواروں کے انتخاب کا عزم رکھتی ہے۔
مزید پڑھیں
یاد رہے کہ گزشتہ روز وزارت صحت نے پمز اور پولی کلینک اسپتال میں ایگزیکٹو ڈائریکٹر (بی پی ایس 21) کی پوسٹ کے لیے وزارت دفاع سے پاکستان آرمی میڈیکل کور سے مساوی گریڈ کے آفیسرز کی 3 سال کے لیے تعیناتی کی درخواست کی تھی۔
وزارت صحت کی جانب سے وزارت دفاع پاکستان کے سیکریٹری کے نام لکھے گئے خط میں کہا گیا تھا کہ پاکستان انسٹی ٹیوٹ آف میڈیکل سائنسز (پمز) اسلام آباد کے ایگزیکٹو ڈائریکٹر (بی ایس-21) کے عہدے کے لیے معیاری شرائط و ضوابط کے تحت مساوی گریڈ کے اہل اور قابل ایگزیکٹو ڈائریکٹر کی خدمات پیش کی جائیں۔
خط میں کہا گیا تھا کہ پاکستان انسٹی ٹیوٹ آف میڈیکل سائنسز (پمز) اسلام آباد اور فیڈرل گورنمنٹ پولی کلینک اسپتال (ایف جی پی سی) کے ایگزیکٹو ڈائریکٹر (بی ایس 21) کے عہدے کسی اہل افسر کی عدم دستیابی کی وجہ سے خالی پڑے ہیں۔
خط کے مطابق اسلام آباد میں عوام کے لیے بڑے پیمانے پر صحت کی دیکھ بھال کی خدمات کی مؤثر فراہمی کو یقینی بنانے کے لیے عبوری انتظام کے طور پر پاکستان آرمی میڈیکل کور سے ان آسامیوں کو پر کرنے کی خواہش ظاہر کی گئی تھی۔
درخواست کے آخر میں لکھا گیا تھا کہ یہ معاملہ وزارت نیشنل ہیلتھ سروسز، ریگولیشنز اینڈ کوآرڈینیشن کے سیکرٹری کی منظوری سے پیش کیا گیا ہے۔
