نگراں وفاقی وزیر صحت ڈاکٹر ندیم جان نے ڈریپ کو جعلی، غیر رجسٹرڈ اور اسمگل شدہ ادویات کے خلاف کریک ڈاؤن کا حکم جاری کردیا، اور ایسی تمام ادویات کی سیل سٹوریج اور ڈسٹری بیوشن فوری طور پر بند کرنے کی ہدایات جاری کردیں۔
ترجمان وزارت صحت کے مطابق نگراں وفاقی وزیر صحت ڈاکٹر ندیم جان نے جعلی غیر رجسٹرڈ اور اسمگل شدہ ادویات کی سیل سٹوریج اور ڈسٹری بیوشن فوری طور پر بند کرنے کا حکم دیا ہے۔
ترجمان کے مطابق وفاقی وزیر صحت نے تمام غیر رجسٹرڈ جعلی ادویات میں ملوث عناصر کے خلاف سخت قانونی کارروائی کرنے کے احکامات جاری کیے ہیں، اور ساتھ ہی ہدایت کی ہے کہ مارکیٹ میں نگرانی کے دائرہ کار کو بڑھایا جائے۔
وفاقی وزیر کی ہدایات کے مطابق مارکیٹس جن میں ڈسٹری بیوٹر، فارمیسی ، میڈیکل اسٹورز اور ہول سیل بازار شامل ہیں، میں نگرانی کے عمل کو بڑھایا جائے۔
ندیم جان نے کہاکہ عوام کو معیاری اور محفوظ ادویات کی بلا تعطل فراہمی کے لیے مؤثر اقدامات کیے جارہے ہیں۔
واضح رہے کچھ روز قبل لاہور میں جعلی انجیکشن لگانے کے باعث متعدد مریضوں کی آنکھیں خراب ہونے کے واقعات سامنے آئے جس کی وجہ سے وزارت صحت اور انتظامیہ متحرک دکھائی دے رہی ہے۔
