پاکستان ڈیمو کریٹک موومنٹ (پی ڈی ایم) کے ترجمان حافظ حمد اللہ نے ایک بار پھر اپنی توپوں کا رخ چیئرمین تحریک انصاف عمران خان کی جانب کر لیا۔
ترجمان پی ڈی ایم حافظ حمد اللہ نے عمران خان کو آڑے ہاتھوں لیتے ہوئے کہا کہ جس جنرل (ر) قمر جاوید باجوہ نے عمران خان کو اقتدار تک پہنچایا یہ آج اسی کو تنقید کا نشانہ بنا رہا ہے، عمران خان اپنے محسن کے ساتھ وہی کچھ کر رہا ہے جو جہانگیر ترین کے ساتھ کرتے رہے۔
انہوں نے مزید کہا کہ عمران خان نے جہانگیر ترین کو بیلیسنگ ایکٹ کے تحت نااہل کروایا، عمران خان نے اپنے ہر محسن کو ڈسا ہے۔
ترجمان پی ڈی ایم نے کہا کہ عمران خان جیسا آئین کش، محسن کش اور سیاسی خودکش قوم کی قیادت کے قابل نہیں، دن رات ریاست مدینہ کا بھاشن دینے والا عمران بےحیائی کی تصویر بن چکا ہے۔
حافظ حمد اللہ نے مزید کہا کہ عمران خان وزیراعظم تو کیا وزیراعظم ہاؤس کے آگے سے بھی گزرنے کےاہل نہیں رہے، وائٹ پیپر جاری کرنے سے عمران خان کے بلیک کریکٹر کو وائٹ نہیں کیا جا سکتا۔
