صدر مملکت آصف علی زرداری سے پاکستان میں سعودی عرب کے سفیر نواف بن سعید المالکی نے ایوان صدر میں الوداعی ملاقات کی، جس کے دوران صدر مملکت نے پاک سعودی دیرینہ برادرانہ اور تزویراتی تعلقات کے استحکام کے لیے سعودی سفیر کی خدمات اور تعاون کو سراہا۔
صدر آصف علی زرداری نے کہاکہ سعودی سفیر نواف بن سعید المالکی نے پاکستان اور سعودی عرب کے دوطرفہ تعلقات کے فروغ، بالخصوص سیاسی، اقتصادی اور تجارتی شعبوں میں اہم کردار ادا کیا ہے۔
President appreciates Saudi Ambassador Nawaf bin Said Al-Malkiy’s contribution to strengthening Pakistan-Saudi ties
President Asif Ali Zardari has appreciated the contribution of Ambassador of the Kingdom of Saudi Arabia to Pakistan, Nawaf bin Said Al-Malkiy, towards… pic.twitter.com/7nONHyo45u
— The President of Pakistan (@PresOfPakistan) August 23, 2026
صدر مملکت نے کہاکہ پاکستان سعودی عرب کے ساتھ اپنی دیرینہ دوستی اور تزویراتی شراکت داری کو قدر کی نگاہ سے دیکھتا ہے۔
انہوں نے پاکستان کے لیے مملکتِ سعودی عرب کی مستقل حمایت کو بھی سراہا۔
صدر آصف علی زرداری نے کہاکہ سفیر نواف بن سعید المالکی کے دور میں قائم ہونے والی مضبوط بنیاد آنے والے برسوں میں بھی پاک سعودی عرب دوطرفہ تعاون کی رہنمائی کرتی رہے گی۔
سعودی سفیر کا صدر، حکومت اور عوام سے اظہار تشکر
اس موقع پر سعودی سفیر نواف بن سعید المالکی نے پاکستان میں اپنے قیام کے دوران ملنے والی محبت، گرمجوشی اور تعاون پر صدر مملکت، حکومت اور پاکستانی عوام کا شکریہ ادا کیا۔
سعودی سفیر نے کہاکہ وہ پاکستان اور اس کے عوام کو ہمیشہ قدر و احترام کی نگاہ سے دیکھتے رہیں گے۔
صدر آصف علی زرداری نے سعودی سفیر نواف بن سعید المالکی کے لیے مستقبل کی ذمہ داریوں میں کامیابی اور نیک خواہشات کا اظہار کیا۔
