لاہور: اسکول کے باہر سے طالب علم اغوا، ویڈیو منظر عام پر آگئی

لاہور کے علاقے جوہر ٹاؤن میں دن دہاڑے اسکول کے باہر سے طالب علم کو اغوا کر لیا گیا۔

تفصیلات کے مطابق واقعہ تھانہ ستوکتلہ، جوہر ٹاوٴن کی حدود میں پیش آیا۔ اغوا کار اسکول کے سامنے سے طالب علم کو زبردستی کار میں بٹھا کرلے گئے۔ اغوا کاروں نے طالب علم پر تشدد بھی کیا۔

واقعہ کی سی سی ٹی وی فوٹیج میں دیکھا جا سکتا ہے کہ مغوی اسکول کے سامنے موٹرسائیکل پر بیٹھا ساتھ کھڑے ایک لڑکے سے بات چیت میں مصروف ہے، اسی اثنا میں ایک موٹرسائیکل سوار پیچھے سے آکر اس کی موٹر سائیکل کو ٹکر مارتا ہے، مغوی اپنی موٹر سائیکل سے اتر کر اسے پکڑنے کی کوشش کرتا ہے، اسی لمحے 5 سے 6 مسلح ملزمان مغوی کو آکر دبوچ لیتے ہیں اور اسے زبردستی کار میں بٹھا کر اغوا کر کے لے جاتے ہیں۔

لاہور میں اسکول کے باہر سے دن دیہاڑے طالب علم اغوا، دیکھیں اس ویڈیو میں #WENews #Pakistan #Lahore pic.twitter.com/IDTFxMdvyv

— WE News (@WENewsPk) October 31, 2023

ویڈیو میں دیکھا جا سکتا ہے کہ مسلح ملزمان طالب علم کی مدد کےلیے قریب آنے والے افراد کو اسلحہ دکھا کر ڈرا دھمکا رہے ہیں، طالب علم کافی دیر تک مزاحمت کرتا رہا تاہم پولیس موقع پر نہیں پہنچی اور اسلحے کے خوف سے قریب موجود شہری بھی اس کے قریب نہ آئے۔

میڈیا رپورٹس کے مطابق لاہور پولیس نے واردات کا مقدمہ درج کرکے اغوا کاروں کی تلاش کے لیے شہر بھر میں الرٹ جاری کردیا ہے اور ملزمان کی گرفتاری کے لئے سی سی ٹی وی ویڈیوز سے مدد لی جارہی ہے۔ سوشل میڈیا پر زیر گردش اطلاعات کے مطابق مغوی نوجوان کا نام ارحم ہے جسے مخالفین نے تایا کے قتل کیس کی پیروی کرنے پر اغوا کیا ہے، اغوا کاروں میں مصطفی اور منشا ٹلی شامل ہیں۔