خادم حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز کی ہدایت پر سعودی وزارت دفاع کی ایئر ایمبولینس کے ذریعے پیدائشی طور پر جڑے ہوئے نائیجیرین جڑواں بچے ’حسنہ اور حسینہ‘ اپنے والدین کے ساتھ منگل کو ریاض کے کنگ خالد ایئرپورٹ پہنچے۔
نائجیرین بچوں کے پہنچتے ہی طبی معائنہ کے لیے انہیں بچوں کے خصوصی اسپتال کنگ عبد اللہ ہاسپٹل پہنچایا گیا تاکہ ان کو الگ کرنے کے امکانات پر غور کیا جا سکے۔
مزید پڑھیں
سعودی پریس ایجنسی (ایس پی اے) کے مطابق مشیر اعلیٰ، شاہ سلمان ریلیف سینٹر کے جنرل سپروائزر اور میڈیکل ٹیم کے سربراہ ڈاکٹر عبداللہ بن عبدالعزیز الربیعہ نے خادم حرمین شریفین کا پیدائشی جڑے ہوئے جڑواں بچوں کو الگ کرنے کے پروگرام کو اہمیت دینے پر ان کا تہہ دل سے شکریہ ادا کیا۔ انہوں نے کہا کہ یہ پروگرام سعودیہ کی شعبہ طب میں مہارت کو ظاہر کرتا ہے جس میں سعودی عرب کے وژن 2030ء کے اہداف کے مطابق مملکت میں صحت کے شعبے کو ترقی دینا اور اسے دنیا کے ممالک میں سرفہرست لانا ہے۔
نائیجیرین جڑواں بچوں ’حسنہ اور حسینہ‘ کے والدین نے خادم حرمین شریفین اور ولی عہد شہزادہ کا اپنے پرتپاک استقبال اور فراخدلانہ مہمان نوازی پر تہہ دل سے شکریہ ادا کیا اور اللہ تعالی سے دعا کی کہ وہ ان کی اور مملکت سعودیہ کی حفاظت فرمائے اور ان کو بہترین اجر سے نوازے اور مملکت سعودیہ کا امن و امان برقرار رکھے۔
