وفاقی کابینہ کی ذیلی کمیٹی برائے ای سی ایل نے چیئرمین پاکستان تحریک انصاف (پی ٹی آئی) عمران خان کا نام ای سی ایل میں ڈالنے کی سفارش کی ہے۔
وزارت داخلہ نے اپنے ایک بیان میں کہا ہے کہ قومی احتساب بیورو (نیب) کی سفارش پر عمران خان کا نام ای سی ایل میں ڈالنے کی سفارش کی ہے۔ ’نیب نے 190 ملین پاؤنڈ اسکینڈل میں چیئرمین پی ٹی آئی عمران خان کا نام ای سی ایل میں ڈالنے کی سفارش کی ہے‘۔
میڈیا رپورٹس کے مطابق چیئرمین پی ٹی آئی عمران خان کی اہلیہ بشریٰ بی بی کا نام بھی ای سی ایل میں ڈالنے کی سفارش کی گئی ہے۔
مزید پڑھیں
نگراں وزیر داخلہ سرفراز بگٹی کی زیر صدارت کابینہ کی ذیلی کمیٹی کا اجلاس ہوا جس میں وزارت سمیت دیگر متعلقہ اداروں کے افسران بھی شریک ہوئے۔
ذیلی کمیٹی نے اجلاس کے بعد بتایا ہے کہ 41 افراد کے نام ایگزٹ کنٹرول لسٹ میں شامل کرنے کی سفارش کی گئی ہے جن میں 190 ملین پاونڈ اسکینڈل میں عمران خان سمیت 29 افراد کے نام بھی موجود ہیں۔
واضح رہے کہ نیشنل کرائم ایجنسی برطانیہ (این سی اے) نے اہم کاروباری شخصیت ملک ریاض اور ان کے خاندان کی 19 کروڑ پاؤنڈ کی رقم ضبط کی تھی جسے ایک تصفیے کے بعد پاکستان منتقل کر دیا گیا تھا۔
عمران خان نے بحیثیت وزیراعظم منظوری دی تھی کہ یہ رقم براہِ راست سپریم کورٹ کے اکاؤنٹ میں بھیجی جائے۔ اس اقدام سے فائدہ ملک ریاض ہی کو ہوا کیوں کہ عدالت عظمیٰ کے حکم پر ان کو 460 ارب روپے جمع کرانے تھے۔
عمران خان پر الزام ہے کہ انہوں نے ملک ریاض سے اس کے بدلے میں فائدے حاصل کیے ہیں جن میں القادر ٹرسٹ کے لیے زمین کا معاملہ سرفہرست ہے۔
دوسری جانب سپریم کورٹ آف پاکستان نے سابق وزیراعظم پاکستان عمران خان کی درخواست ضمانت کو سماعت کے لیے منظور کر لیا ہے۔
چیئرمین پی ٹی آئی عمران خان اس وقت سائفر کیس میں اڈیالہ جیل میں قید ہیں جبکہ انہیں 190 ملین پاؤنڈ اسکینڈل کے کیس میں بھی گرفتار کر لیا گیا ہے اور تحقیقات کی جا رہی ہیں۔
