چین کی کار ساز کمپنی بی وائی ڈی نے پاکستان میں آٹوموبائل بالخصوص الیکٹرانک گاڑیوں کے شعبے میں سرمایہ کاری میں اپنی گہری دلچسپی ظاہر کی ہے۔
بی وائی ڈی کے ایک وفد نے جمعرات کو سیکریٹری سرمایہ کاری بورڈ ڈاکٹر سہیل راجپوت سے ملاقات کے دوران پاکستان کے الیکٹرانک وہیکل سیکٹر میں سرمایہ کاری کرنے میں گہری دلچسپی ظاہر کی۔
سرمایہ کاری بورڈ کے سیکریٹری نے پاکستان میں الیکٹرانک گاڑیوں کی اہمیت پر زور دیتے ہوئے اس شعبے میں کمپنی کی دلچسپی کو سراہا۔ انہوں نے وفد کا خیرمقدم کرتے ہوئے کہا کہ حکومت ملک میں کاروبار اورسرمایہ کاری کے فروغ کے لیے اقدامات کررہی ہے۔
ڈاکٹر سہیل راجپوت نے وفد کو پاکستا ن میں سرمایہ کاری میں سہولیات کی فراہمی کے حکومتی عزم کا اعادہ بھی کیا۔ بی وائی ڈی کا وفد پاکستان کے حالیہ دورے میں سرمایہ کاری بورڈ کی مدد سے مقامی شراکت داروں کے ساتھ اہم ملاقاتیں کرے گا۔
