پاکستان بار کونسل نے سندھ ہائیکورٹ پر پاکستان بار کے اندرونی معاملات میں مداخلت کا الزام عائد کرتے ہوئے چیف جسٹس پاکستان سے کارروائی کا مطالبہ کیا ہے۔
پاکستان بار کونسل سے جاری اعلامیے کے مطابق چیف جسٹس پاکستان سے مطالبہ کیا گیا ہے کہ سندھ ہائیکورٹ کے خلاف مناسب کارروائی کی جائے۔
اعلامیے میں کہا گیا ہے کہ مشاہدے میں آیا ہے کہ پاکستان بار کے فیصلوں کے خلاف سندھ ہائیکورٹ مقدمات سن رہی ہے، سندھ ہائیکورٹ سمیت کوئی صوبائی ہائیکورٹ پاکستان بار کونسل کے فیصلوں کا جائزہ نہیں لے سکتی۔
کہا گیا ہے کہ پاکستان بار کونسل وکلا کے امور سے متعلق ایک قانونی ادارہ ہے، پاکستان بار کونسل کے فیصلوں کا صرف اسلام آباد کی عدالتیں جائزہ لے سکتی ہیں۔
اعلامیے کے مطابق پاکستان بار کونسل اور اس کی ایگزیکٹیو کمیٹی کے فیصلوں کو قانونی تحفظ حاصل ہے، من پسند افراد کو نوازنے کے لیے سندھ ہائیکورٹ غیر قانونی طریقے سے مقدمات سن رہی ہے۔
